Storm: రెండువారాలకు సరకులు.. ఇసుక బ్యాగులు దగ్గరుంచుకోండి..!

కాలిఫోర్నియా: అమెరికా(America)లోని కాలిఫోర్నియా(California)కు భీకర తుపాను ముప్పుపొంచి ఉంది. గురువారం ఆ రాష్ట్రంలోని మధ్య, ఉత్తర ప్రాంతాల్లో తుపాను బీభత్సం సృష్టించే అవకాశం ఉందని వాతావరణ విభాగం అధికారులు హెచ్చరించారు. ‘భారీ వర్షాలు, మంచు కరగడం వల్ల వరదల ముప్పు పొంచి ఉంది. అవి లోతట్టు ప్రాంతాలకు తీవ్ర ప్రమాదంగా మారొచ్చు’ అని వెల్లడించింది. ఈ తుపానుతో చిన్న కాలువలు, సరస్సులు పొంగుతాయని, తర్వాత నదుల్లో నీటి ప్రవాహం పెరిగి, రోడ్లన్నీ వరదనీటితో నిండిపోతాయని వాతావరణ విభాగం అధికారి ఒకరు వెల్లడించారు. 

ఈ హెచ్చరికల నేపథ్యంలో మాంటిరే కౌంటీ తన ప్రజలను అప్రమత్తం చేసింది. రెండు వారాలకు సరిపడా సరకులను దగ్గర ఉంచుకోవాలని నివాసితులకు సూచించింది. అలాగే ఇసుక బ్యాగులను దగ్గర ఉంచుకోవాలని చెప్పింది. నివారణ చర్యల్లో భాగంగా వాటిని వాడేందుకు ఈ సూచన చేసింది. గత కొంతకాలంగా కాలిఫోర్నియా(California) ప్రకృతి వైరీత్యాలతో వణికిపోతోంది. ఫిబ్రవరిలో ముంచుగుప్పిట్లో మునిగిపోయింది. 70mphవేగంతో వీచిన గాలులు అల్లకల్లోలం  చేశాయి.