కంబోడియాలో విషాదం.. వృద్ధుడిపై 40 మొసళ్ల దాడి!

ఇంటర్నెట్‌ డెస్క్‌: కంబోడియాలో (Cambodia) విషాద ఘటన చోటుచేసుకుంది. ప్రమాదవశాత్తు మొసళ్ల ఎన్‌క్లోజర్‌లో (Crocodiles) పడిన ఓ వృద్ధుడు ప్రాణాలు కోల్పోయాడు. వెంటనే బయటకు వచ్చేందుకు ప్రయత్నించినప్పటికీ అందులోని 40 మొసళ్లు అతడిపై దాడి చేయడంతో ప్రాణాలు కోల్పోయాడు.

కంబోడియాలోని సయొమ్ రీఫ్‌ ప్రాంతానికి చెందిన ఓ కుటుంబం మొసళ్లను పెంచుతోంది. ఈ క్రమంలో వాటి సంరక్షణ చూస్తున్న ఓ వృద్ధుడు (72), గుడ్లు పెట్టే బోనులో నుంచి ఓ మొసలిని బయటకు పంపించేందుకు ప్రయత్నించాడు. చేతిలో ఉన్న కర్రతో దానిని కదిలించాడు. ఊహించిన విధంగా ప్రవర్తించిన ఆ మొసలి.. కర్రను లోపలికి లాక్కుంది. దాంతో ఆ వృద్ధుడు ఎన్‌క్లోజర్‌లో పడిపోయాడు. వెంటనే అందులో ఉన్న మొసళ్లన్నీ అతడిని చుట్టుముట్టాయి. అతడు తప్పించుకునేందుకు ప్రయత్నించినప్పటికీ వీలుకాలేదు. దాదాపు 40మొసళ్లు దాడి చేయడంతో ఆ వృద్ధుడి శరీరం ముక్కలుగా అయ్యిందని స్థానిక పోలీసులు వెల్లడించారు.

అంకోర్‌ వాట్‌కు ముఖద్వారంగా ఉన్న సయొమ్ రీఫ్‌ ప్రాంతంలో మొసళ్ల పెంపకం ఎక్కువ. ఇదే గ్రామంలో 2019లోనూ ఇదే విధమైన ఘటన చోటుచేసుకుంది. మొసళ్లను పెంచుతున్న ఓ కుటుంబానికి చెందిన రెండేళ్ల చిన్నారిపై  అవి దాడి చేశాయి. దీంతో ఆ చిన్నారి ప్రాణాలు కోల్పోయింది.