Breaking | Feedback | E-PAPER | Pratibha

H-1B visa: హెచ్‌-1బీ వీసాదారులకు కెనడా స్కీమ్‌.. తొలి రోజే టార్గెట్‌ రీచ్‌

హెచ్‌-1బీ వీసాదారుల (H-1B Visa Holders) కోసం కెనడా (Canada) ప్రభుత్వం తీసుకొచ్చిన సరికొత్త వర్క్‌ పర్మిట్‌కు మొదటి రోజే దరఖాస్తులు వెల్లువెత్తాయి. దీంతో స్కీమ్‌ను ముగించేశారు.

Updated : 20 Jul 2023 14:50 IST

టొరొంటో: నైపుణ్యం కలిగిన ఉద్యోగులను ఆకర్షించడమే లక్ష్యంగా.. అమెరికా (USA)లో పనిచేస్తున్న హెచ్‌-1బీ వీసాదారుల (H-1B Visa) కోసం కెనడా (Canada) ప్రభుత్వం తీసుకొచ్చిన కొత్త స్కీమ్‌కు విశేష ఆదరణ లభించింది. ఈ పథకాన్ని అందుబాటులోకి తీసుకొచ్చిన తొలి రోజునే దరఖాస్తులు ప్రభుత్వం విధించిన పరిమితి చేరుకున్నాయి. దీంతో ఈ స్కీమ్ ముగిసిందని, కొత్త దరఖాస్తులను తీసుకోవడం లేదని కెనడా వలసలు, శరణార్థులు, పౌరసత్వ సేవల సంస్థ (IRCC) తాజాగా ప్రకటించింది.

‘‘అమెరికాలోని కంపెనీల హై-టెక్‌ విభాగాల్లో ఎన్నో వేలమంది ఉద్యోగులు పనిచేస్తున్నారు. వీరిలో హెచ్‌1-బీ వీసాతో అక్కడ పనిచేస్తున్న వారు మూడేళ్లపాటు తమ దేశంలో పని చేసుకునేందుకు (Work Permit) జులై 16 నుంచి దరఖాస్తు చేసుకోవచ్చు’’ అని కెనడా (Canada) ప్రభుత్వం ఇటీవల ప్రకటించిన విషయం తెలిసిందే. ఈ కొత్త స్కీమ్‌ ఏడాది పాటు లేదా 10 వేల దరఖాస్తులను స్వీకరించే వరకే అందుబాటులో ఉంటుందని తెలిపింది.

అమెరికాలో ‘అత్యంత నైపుణ్య ఐటీ నిపుణుల’ కొరత

అయితే, జులై 16న స్కీమ్‌ను అందుబాటులోకి తీసుకురాగా.. జులై 17వ తేదీ నాటికే 10వేల దరఖాస్తులు వచ్చినట్లు ఐఆర్‌సీసీ గురువారం వెల్లడించింది. ‘‘హెచ్‌-1బీ వీసాదారుల (H-1B Visa) కోసం తాత్కాలికంగా తీసుకొచ్చిన పబ్లిక్‌ పాలసీ ముగిసింది. ఇది గరిష్ఠ పరిమితిని చేరుకోవడంతో కొత్త దరఖాస్తులను తీసుకోవడం లేదు’’ అని తెలిపింది.

దరఖాస్తు అనంతరం అనుమతి పొందిన వారు కెనడాలో ఏ ప్రాంతంలోనైనా, ఏ సంస్థలోనైనా ఉద్యోగం చేసుకునే వెసులుబాటు ఉంటుంది. వారి కుటుంబ సభ్యులు ఉద్యోగం లేదా చదువు కోసం తాత్కాలిక వీసాకు దరఖాస్తు చేసుకునే అవకాశం లభిస్తుంది. అయితే, ఈ స్కీమ్‌ను మళ్లీ అందుబాటులోకి తెస్తారా? కేవలం ఈ 10వేల మందికే అవకాశం కల్పిస్తారా? అన్నదానిపై కెనడా ప్రభుత్వం స్పష్టతనివ్వలేదు. అయితే ఏ కారణం చేతనైనా దరఖాస్తు తిరస్కరణకు గురైతే.. అప్పుడు కొత్త వారు దరఖాస్తు చేసుకునేందుకు వీలు కల్పిస్తారా? లేదా? అన్నది కూడా కెనడా స్పష్టంగా చెప్పలేదు.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.