Chinese Apps: 54 యాప్స్‌పై భారత్‌ నిషేధం.. ఆందోళన వ్యక్తం చేసిన చైనా

దిల్లీ: దేశ భద్రతకు ముప్పు కారణాల దృష్ట్యా చైనాతో సంబంధమున్న 54 యాప్స్‌పై ఇటీవల కేంద్రం నిషేధం విధించింది. కేంద్ర హోంశాఖ సిఫార్సు మేరకే వాటిని నిషేధించినట్లు తెలుస్తోంది. కాగా ఈ పరిణామంపై చైనా స్పందించింది. భారత ప్రభుత్వం తీసుకున్న చర్యలపై ఆందోళన వ్యక్తం చేసింది. 

‘చైనాతో సహా విదేశీ పెట్టుబడిదారులందరితో భారత్ పారదర్శకంగా వ్యవహరిస్తుందని నమ్ముతున్నాం. వివక్షాపూరిత నిర్ణయాలు తీసుకోదనుకుంటున్నాం. అలాగే ఇరు దేశాల మధ్య ఉన్న ఆర్థిక, వాణిజ్య సంబంధాలు మరింత మెరుగయ్యేందుకు తగిన చర్యలు చేపడుతుందని ఆశిస్తున్నాం’ అని ఆ దేశ వాణిజ్య శాఖ ప్రతినిధి గావో ఫెంగ్ వెల్లడించారు. 

ఈ నిషేధంపై ఆ సమయంలో హోంశాఖతో సంబంధమున్న వర్గాలు వివరాలు వెల్లడించాయి. ‘ఈ యాప్స్‌ యూజర్ల నుంచి సున్నితమైన సమాచారాన్ని సేకరిస్తున్నాయి. ఆ డేటాను తమ సొంతదేశంలో ఉన్న సర్వర్లకు బదిలీ చేస్తూ, దుర్వినియోగానికి పాల్పడుతున్నాయి’ అని పేర్కొన్నాయి.