Chinese Woman: మహిళకు అస్వస్థత.. తీవ్ర దగ్గుతో పక్కటెముకలు విరిగిపోయాయట..!

(ప్రతీకాత్మక చిత్రం)

షాంఘై: ఘాటైన ఆహారం తిన్న ఓ మహిళకు ఊహించని పరిణామం ఎదురయ్యింది. ఆహారం తిన్న తర్వాత ఆమెకు తీవ్ర దగ్గు (Coughing fit) బారినపడింది. దగ్గుతోన్న సమయంలో ఛాతిలో శబ్దం వినిపించడంతోపాటు నొప్పి పెరిగింది. తీరా వైద్యులను సంప్రదిస్తే.. ఆమె ఛాతిలోని నాలుగు పక్కటెముకలు విరిగిపోయినట్లు గుర్తించడంతో అవాక్కయ్యింది.

చైనాలోని (China) షాంఘై నగరానికి చెందిన హువాంగ్‌ అనే మహిళ ఇటీవల ఘాటైన ఆహారం తిన్నట్లు తెలిపింది. అనంతరం ఆమెకు తీవ్ర దగ్గు మొదలయ్యింది. అలా తీవ్రంగా దగ్గుతోన్న సమయంలో ఛాతి నుంచి శబ్దం వినపడింది. తొలుత తేలికగా తీసుకున్నప్పటికీ.. కొన్ని రోజుల తర్వాత ఛాతిలో నొప్పి పెరగడం మొదలయ్యింది. దీంతో ఆమె వైద్యులను సంప్రదించింది. సీటీ స్కాన్‌ చేసి పరీక్షించగా.. ఆమె ఛాతిలోని నాలుగు పక్కటెముకలు విరిగిపోయినట్లు తేలింది. దీంతో ఆమెకు బ్యాండేజీలు అవసరమని చెప్పడంతో ప్రస్తుతం చికిత్స కొనసాగుతున్నట్లు సౌత్‌ చైనా మార్నింగ్‌ పోస్ట్‌ పత్రిక వెల్లడించింది.

అయితే, ఇలా పక్కటెముకలు విరిగిపోవడానికి పలు కారణాలను వైద్యులు పేర్కొన్నారు. ముఖ్యంగా ఆమె తక్కువ బరువు ఉండటం, ఎముకలకు ఆధారంగా ఉండే కండరం లేదని చెప్పారు. దీంతో తీవ్రంగా దగ్గిన సమయంలో పక్కటెముకలు విరిగిపోయినట్లు తెలిపారు. ఈ నేపథ్యంలో ఎముక గాయాల నుంచి కోలుకున్న తర్వాత వ్యాయామం, సరైన భోజనం వంటి మార్గాలతో తను కండరాలను బలోపేతం చేసేందుకు ప్రయత్నిస్తానని సదరు మహిళ పేర్కొన్నారు.