Taiwan: అలా దాడి చేస్తారా? అయితే మహాపాపం మూటగట్టుకుంటారు..

తైపీ: అవసరమైతే.. తైవాన్‌ను స్వాధీనం చేసుకునే విషయంలో బలప్రయోగానికి వెనకాడబోమని కమ్యూనిస్ట్ పార్టీ(సీపీసీ) 20వ మహాసభల్లో భాగంగా చైనా అధ్యక్షుడు జిన్‌పింగ్ వ్యాఖ్యానించిన సంగతి తెలిసిందే. దీనిని తైవాన్ తిప్పికొట్టింది. తమపై దాడి చేస్తే.. చైనా అధ్యక్షుడు పాపిగా మిగులుతారంటూ పేర్కొంది.  

‘తైవాన్‌పై దాడిచేస్తే.. జిన్‌పింగ్‌ గొప్పనేత అనే స్థాయి కోల్పోయి, చైనీయుల్లోనే అత్యంత పాపిగా మిగిలిపోతారు’ అని ఆంగ్ల మీడియా కథనం పేర్కొంది. తైవాన్‌ నేషనల్ సెక్యూరిటీ బ్యూరో చీఫ్ వ్యాఖ్యలను ఉటంకిస్తూ వెల్లడించింది. ‘తైవాన్‌ సార్వభౌమాధికార దేశమని తనకు తానే భావిస్తోంది. కానీ, దాన్ని చైనా మాత్రం విడిపోయిన ప్రావిన్సుగానే చూస్తోంది. పునరేకీకరణ కోసం చిత్తశుద్ధితో శాంతియుతంగా ప్రయత్నిస్తాం. అయినప్పటికీ తైవాన్‌ ఏకీకరణకు బలప్రయోగ అస్త్రాన్నీ విడిచిపెట్టలేము. వేర్పాటువాద శక్తులను అడ్డుకునేందుకు అన్ని రకాల చర్యలు తీసుకుంటాం’ అని జిన్‌పింగ్‌ స్పష్టం చేసిన సంగతి తెలిసిందే. వారం రోజుల పాటు కొనసాగనున్న చైనా కమ్యూనిస్టు పార్టీ (CPC) మహాసభలు ఆదివారం ప్రారంభమయ్యాయి. ఈ సందర్భంగా చైనా అధ్యక్షుడిగా జిన్‌పింగ్‌ను వరుసగా మూడోసారి సీపీసీ ఎన్నుకోనుంది.