Mariupol: నిన్నటి వరకు రష్యా.. ఇప్పుడు కలరా..!

కీవ్‌: యుద్ధం కనిపించే ప్రాణ, ఆస్తి నష్టాలకే కాదు.. కనిపించని ఎన్నో దుర్భర పరిస్థితులకు కారణమవుతుంది. రష్యా దురాక్రమణతో ఉక్రెయిన్‌లో ప్రస్తుతం అదే వాతావరణం నెలకొంది. పుతిన్ సేనల దాడులతో ధ్వంసమైన వాటిలో మేరియుపొల్ కూడా ఒకటి. ఆ నగర వీధులు.. శ్మశాన ప్రాంతాలుగా కనిపించాయి. అయితే మృతదేహాలను తొలగించే వ్యవస్థ నిర్వీర్యం కావడంతో.. ఇప్పుడక్కడ కలరా వ్యాధి ప్రబలుతోంది. ఈ విషయాన్ని మేరియుపొల్ మేయర్ వెల్లడించారు. 

‘శవాలు వీధుల్లో కుళ్లిపోతున్నాయి. వాటిని తొలగించే పారిశుద్ధ్య వ్యవస్థ విచ్ఛిన్నమైంది. దాంతో విరేచనాలు, కలరా వ్యాప్తి జరుగుతోంది. యుద్ధంతో సంభవించిన ప్రాణ నష్టం చాలదన్నట్టు, ఈ అనారోగ్యాలు ప్రజల ప్రాణాల మీదకు తెస్తున్నాయి. కొన్ని బావులు కూడా శవాల కారణంగా కలుషితమయ్యాయి’ అని ఆందోళన వ్యక్తం చేశారు. ప్రస్తుతం మేరియుపొల్ రష్యా ఆధీనంలో ఉంది. ఈ నగరంలో ఉన్న మిగతా వారిని కూడా తరలించేందుకు ఐరాస, అంతర్జాతీయ సంస్థలు మానవతా కారిడార్‌ను ఏర్పాటు చేయాలని కోరారు. 

ఈ దురాక్రమణలో 287 చిన్నారులు మృతి..

ఇక యుద్ధం మొదలైన దగ్గరి నుంచి అభంశుభం తెలియని ఉక్రెయిన్ చిన్నారులు ప్రాణాలు కోల్పోతున్నారు. ఇప్పటివరకూ 287 మంది మరణించారు. 492 మంది గాయాలపాలయ్యారు. ఈ విషయాన్ని ఉక్రెయిన్ అధికారులు వెల్లడించారు.