The Square Kilometre Array: ప్రపంచంలో అతిపెద్ద రేడియో టెలిస్కోప్‌ నిర్మాణం షురూ

ఇంటర్నెట్‌డెస్క్‌: 21వ శతాబ్దంలో అతిపెద్ద ప్రాజెక్టుల్లో ఒకదాని నిర్మాణం ప్రారంభమైంది. ది స్క్వేర్‌ కిలోమీటర్‌ ఆర్రే (The Square Kilometre Array )పేరిట అతిపెద్ద రేడియో టెలిస్కోప్‌ నిర్మాణం ఆస్ట్రేలియా(Australia)లో నేడు మొదలుపెట్టారు. దీనిని 2028 నాటికి అందుబాటులోకి తేవాలని లక్ష్యంగా పెట్టుకొన్నారు. దీని నిర్మాణం దక్షిణాఫ్రికా, ఆస్ట్రేలియాల్లో చేపట్టారు. ప్రధాన కార్యాలయం మాత్రం యూకేలో ఉంటుంది. ఖగోళంలో చాలా మిస్టరీలపై పరిశోధనలకు దీనిని వినియోగించనున్నారు. ఐన్‌స్టీన్‌ సిద్ధాంతాలపై కూడా పరిశోధనలు చేయనుంది. భూగోళం వంటి గ్రహాలు మరేమైనా ఉన్నాయేమో అన్న అంశంపై కూడా శోధించనుంది. నేడు ఆస్ట్రేలియా, దక్షిణాఫ్రికాల్లో  నిర్మాణ పనులు ప్రారంభం కానున్నాయి. ఆస్ట్రేలియాలోని మార్చిసన్‌ ప్రాంతంలో 74 చదరపు కిలోమీటర్ల విస్తీర్ణంలో క్రిస్మస్‌ చెట్లు వంటి దాదాపు 1,00,000 పైగా యాంటెన్నాలను నిర్మించనున్నారు.

ఎస్‌కేఏ (SKA) లాసైట్‌ ప్రాజెక్టు నిర్మాణ డైరెక్టర్‌ ఆంటోనీ షింకెల్‌ మాట్లాడుతూ తొలిసారి ఇటువంటి టెలిస్కోప్‌ నిర్మిస్తున్నామని వెల్లడించారు. ప్రపంచ వ్యాప్తంగా చాలా రేడియో, ఆప్టికల్‌ టెలిస్కోప్‌లు ఉన్నా.. దీంతో వాటిని పోల్చలేమని ఆయన పేర్కొన్నారు. దీని నిర్మాణానికి సంబంధించిన ఆలోచన 1990ల్లో వచ్చిందని ఆయన వివరించారు. 2003లో ఈ ప్రాజెక్టుపై పనిచేయడం మొదలుపెట్టామన్నారు. బిగ్‌ బ్యాంగ్‌ తర్వాత విశ్వనిర్మాణం తొలినాళ్లలోకి చూడటానికి  భారీ టెలిస్కోప్‌ అవసరమన్నారు. ఈ టెలిస్కోప్‌ నిర్మాణ పనులు వచ్చే ఏడాది నుంచి చురుగ్గా జరుగుతాయని భావిస్తున్నారు. 2028 నాటికి ఈ పనులు పూర్తవుతాయని అంచనావేశారు. అదే సమయంలో దక్షిణాఫ్రికా(South Africa )లో 197 భారీ డిష్‌లను ఏర్పాటు చేయనున్నారు. వీటి మొత్తాన్ని కలిపితే ఇది ప్రపంచంలోనే అతిపెద్ద ప్రాజెక్టుగా నిలుస్తుంది. ఈ ప్రాజెక్టులో 16 దేశాలు కలిసి పనిచేస్తున్నాయి.