Covid-19 : న్యూయార్క్‌లో పెరుగుతోన్న కొవిడ్‌ కేసులు

న్యూయార్క్: న్యూయార్క్‌లో గత కొద్ది వారాలుగా మళ్లీ కొవిడ్‌ కేసులు పెరుగుతున్నాయి. దీంతో నిబంధనలను కఠినం చేస్తూ అధికారులు ఉత్తర్వులు జారీ చేశారు. కొవిడ్‌ అలర్ట్‌ స్థాయిని ‘మీడియం’ నుంచి ‘హై’కి పెంచుతూ న్యూయార్క్‌ వాసులను హెచ్చరించారు. వైరస్‌ సామాజిక వ్యాప్తి అధికంగా ఉండటంతోపాటు  ఆరోగ్య సంరక్షణా వ్యవస్థపై ఒత్తిడి పెరుగుతుందని  అధికారులు తెలిపారు. ఈ నేపథ్యంలో నగర వాసులు కరోనా నిబంధనలు పాటిస్తూ సురక్షితంగా ఉండాలని నగర ఆరోగ్య శాఖ కమిషనర్ డాక్టర్ అశ్విన్ వాసన్ సూచించారు.

ఏప్రిల్ ప్రారంభం నుంచి అమెరికాలో రోజువారీ కేసుల సంఖ్య మళ్లీ పెరుగుతూనే ఉంది. ఇప్పటి వరకూ మహమ్మారి సోకి మరణించిన వారి సంఖ్య  1 మిలియన్‌ దాటింది. న్యూయార్క్‌లో మే నెల ఆరంభంలో కొవిడ్‌ అలర్ట్‌ను తక్కువ స్థాయి నుంచి మీడియానికి పెంచారు.