Europe: వీధిలోకి వచ్చి కాల్పులు.. 11 మంది మృతి

దుండగుడిని మట్టుబెట్టిన పోలీసులు
మాంటినిగ్రోలో ఘటన

సెంటింజ్‌: ఐరోపాలోని మాంటినిగ్రో దేశంలో ఓ వ్యక్తి (34) విచక్షణారహితంగా కాల్పులు జరిపి 11 మందిని పొట్టనపెట్టుకున్నాడు. అనంతరం పోలీసుల కాల్పుల్లో అతను కూడా మృతిచెందాడు. తొలుత కుటుంబంతో తగాదా పడిన దుండగుడు ఒక్కసారిగా రెచ్చిపోయి వీధిలోకి వచ్చి కనిపించిన వారందరిపైనా కాల్పులకు తెగబడ్డాడు. అప్పటికి వీధిలో చిన్నపిల్లలు సహా పలువురు ఉండగా.. వారిలో 11 మంది మృతి చెందారు. వెంటనే రంగంలోకి దిగిన పోలీసులు దుండగుడిపై కాల్పులు జరపడంతో మృతి చెందాడు. మాంటొనెగ్రో రాజధాని పొడొగ్రికాకు 36 కి.మీ.ల దూరంలోని సెంటెంజీ నగరంలో శుక్రవారం ఈ దారుణ ఘటన చోటుచేసుకుంది.  

జైలులో ముఠా తగాదా : 11 మంది మృతి

మెక్సికోలోని జైలులో చోటుచేసుకున్న ముఠా తగాదా, అనంతర హింసాత్మక ఘటనల్లో 11 మంది మృతి చెందారు. నగర సరిహద్దులో ఉన్న జైలులో తొలుత ఓ ముఠా కొట్లాటకు దిగడంతో ఇద్దరు ఖైదీలు చనిపోయారు. విషయం బయటకు రావడంతో పక్కనే ఉన్న సివుదాద్‌ జువారెజ్‌లోని ముఠాలు రెచ్చిపోయి 9 మందిని హతమార్చాయి.