Video: ఇస్తాంబుల్‌లో భారీ పేలుడు.. ఆరుగురి మృతి.. 53మందికి గాయాలు

ఇస్తాంబుల్‌: తుర్కియేలోని ఇస్తాంబుల్‌(Istanbul)లో భారీ పేలుడు(Explosion) సంభవించింది. ఇస్తాంబుల్ నడిబొడ్డున నిత్యం పర్యాటకులు, స్థానికుల సంచారంతో రద్దీ ఉండే ఇస్తిక్‌లాల్‌ అవెన్యూలో జరిగిన ‘బాంబు దాడి’ తీవ్ర కలకలం రేపింది. ఈ ఘటనలో ఆరుగురు మృతిచెందగా.. 53మందికి గాయాలయ్యాయి. స్థానిక కాలమానం ప్రకారం సాయంత్రం 4.20 గంటల సమయంలో జరిగిన ఈ పేలుడు ధాటికి  స్థానికులు తీవ్ర భయాందోళనకు గురై పరుగులు పెట్టారు. ఈ ఘటనలో ప్రాణనష్టంతో పాటు అధిక మంది గాయపడి ఆస్పత్రుల్లో చికిత్స పొందుతున్నట్టు ఇస్తాంబుల్‌ గవర్నర్‌ అలీ యెర్లికయా వెల్లడించారు. ఘటనా స్థలానికి పోలీసులు, ఆరోగ్య, అగ్నిమాపక బృందాలు చేరుకొని సహాయక చర్యలు చేపట్టినట్టు పేర్కొన్నారు. అయితే, మరో పేలుడు సంభవించే అవకాశం ఉండటంతో ఇస్తిక్‌లాల్‌ స్ట్రీట్‌ను పోలీసులు మూసివేశారు. ఈ ఘటనలో మృతుల సంఖ్య పెరిగే అవకాశం ఉంది.

ఇది విద్రోహపూరిత దాడి.. శిక్ష తప్పదు: ఎర్డొగాన్‌

ఈ ఘటనపై తుర్కియే అధ్యక్షుడు ఎర్డొగాన్‌ స్పందించారు. ఇండోనేషియాలోని బాలిలో జరగనున్న G-20 శిఖరాగ్ర సమావేశానికి బయల్దేరడానికి ముందు ఆయన మీడియాతో మాట్లాడారు. ఈ పేలుడు ఒక విద్రోహ పూరిత చర్యగా పేర్కొన్న ఆయన.. దోషుల్ని శిక్షిస్తామన్నారు. ఇస్తాంబుల్ గవర్నర్‌ నుంచి వచ్చిన సమాచారం ప్రకారం.. ఇప్పటివరకు ఈ ఘటనలో ఆరుగురు మృతిచెందగా.. 53మంది గాయపడినట్టు తెలిపారు. ఘటనా స్థలంలోనే నలుగురు మృతిచెందగా.. ఆస్పత్రిలో చికిత్సపొందుతూ మరో ఇద్దరు ప్రాణాలు విడిచారన్నారు.