China: చైనా అడ్డాలో కూలిన అమెరికా ఎఫ్‌-35..!

 మరోసారి శకలాల కోసం కంగారు..

ఇంటర్నెట్‌డెస్క్‌: అమెరికాకు ఎఫ్‌-35 రహస్యాలను కాపాడుకోవడం తలకు మించిన భారంగా మారుతోంది. ప్రమాదం జరిగిన ప్రతిసారీ దాని శకలాలను సమీకరించడం పెద్ద తతంగా మారుతోంది. నవంబర్‌లో బ్రిటన్‌కు చెందిన ‘క్వీన్‌ ఎలిజిబెత్‌’ విమాన వాహక నౌక పై నుంచి ఎఫ్‌-35 విమానం మధ్యదరా సముద్రంలో కూలిపోయింది. అప్పట్లో రష్యన్లు దాని శకలాల కోసం ప్రయత్నిస్తారేమోనని అమెరికా బెంబేలెత్తిపోయింది. చివరికి కొన్ని వారాల తర్వాత దానిని గుర్తించింది. ఈ సారి డ్రాగన్‌ అడ్డా అయిన దక్షిణ చైనా సముద్రంలో ఎఫ్‌-35 కూలిపోయింది. అమెరికా ఎయిర్‌క్రాఫ్ట్‌ క్యారియర్‌ యూఎస్‌ఎస్‌ కార్ల్‌ విన్సన్‌పై ఈ ఘటన చోటు చేసుకొంది. ఈ ఘటనలో మొత్తం ఏడుగురు సిబ్బంది కూడా గాయపడ్డారు. 

ఈ విమానానికి అత్యాధునిక రహస్య పరికరాలను అమర్చారు. ఈ ప్రమాదం అంతర్జాతీయ జలాల్లో జరిగింది. ప్రస్తుతం ఇది సముద్రం అడుగున పడిపోయింది. దక్షిణ చైనా సముద్రం మొత్తం తనదే అని చైనా చెప్పుకొంటోంది. ఈ నేపథ్యంలో చైనా దళాలు చేతికి ఈ శకాలు దక్కకుండా చేసేందుకు అమెరికా శరవేగంగా ప్రయత్నాలు చేస్తోంది. ఈ శకలాలను బయటకు తీసేందుకు కనీసం 10 రోజులు పట్టవచ్చు. ఆలోపు బ్లాక్‌బాక్స్‌ బ్యాటరీ అయిపోతే విమానం ఎక్కడుందో గుర్తించడం సవాలుగా మారుతుంది. 

ఎగిరే కంప్యూటర్‌..! 

ఎఫ్‌-35పూర్తిగా అత్యాధునికమైన విమానం. దీనిని నిపుణులు ఎగిరే కంప్యూటర్‌తో పోలుస్తారు. దీనిలో అమెరికా ఇతర ఆయుధాలతో అనుసంధానయ్యేలా లింకింగ్‌ నెట్‌వర్క్‌ సెన్సర్లు ఉన్నాయి. వీటి ఆధారంగా లక్ష్యాలపై ఎఫ్‌-35 దాడి చేస్తుంది. చైనా వద్ద ఆ టెక్నాలజీ లేదు. దీంతో ఈ శకలాల కోసం డ్రాగన్‌ తీవ్రంగా ప్రయత్నించడం ఖాయం. వారి చేతికి అవి దక్కతే ఎఫ్‌-35 లింకింగ్‌ నెట్‌వర్క్‌లోకి చైనా కూడా ప్రవేశించగలగుతుంది.  

* ఈ విమానం సేకరించిన సమాచారాన్ని నెట్‌వర్క్‌ సిస్టమ్‌ ద్వారా అత్యంత కచ్చితంగా మిగిలిన వ్యవస్థలతో పంచుకొంటుంది. 

* శత్రుదేశాల గగనతలంలో కూడా ఈ విమానం అత్యంత రహస్యంగా ప్రయాణించగలదు. దీనిని శత్రువులు గుర్తించడం దాదాపు అసాధ్యం. అమెరికా ఎయిర్‌క్రాఫ్ట్‌ క్యారియర్లపై ఉపయోగిస్తున్న తొలి స్టెల్త్‌ జెట్‌ ఇదే. 

* ఈ ప్రపంచలోనే అత్యంత శక్తిమంతమైన ఫైటర్‌జెట్‌ ఇంజిన్‌ను ఈ విమానానికి అమర్చారు. ఇది గంటకు 1,200 మైళ్ల వేగంతో ప్రయాణిస్తుంది. ఇది శబ్దవేగం కంటే 1.6రెట్లు ఎక్కువ. 

ప్రమాదాలకు నెలవుగా కార్ల్‌ విన్సన్‌..!

అమెరికా అణుశక్తి విమాన వాహక నౌక కార్ల్‌ విన్సన్‌పై  ఉన్న వింగ్‌-2 విభాగంపై నవంబర్‌ 22 నుంచి ఇప్పటి వరకు మొత్తం ఐదు ప్రమాదాలు చోటు చేసుకొన్నాయి. 

* నవంబర్‌ 22న ఎఫ్‌ఏ 18ఈ యుద్ధవిమానం ఇంజిన్‌లో మంటలు చెలరేగాయి. అయినా సురక్షితంగా ల్యాండ్‌ చేశారు. 

* నవంబర్‌ 24వ తేదీన ఎంహెచ్‌-60 సీహాక్‌ హెలికాప్టర్‌ అనుకోకుండా సోనార్‌కు సంబంధించిన సామగ్రిని పోగొట్టుకొంది. శిక్షణ సమయంలో ఇది జరిగింది. 

* నవంబర్‌ 29న ఎఫ్‌ఏ 18ఈ సూపర్‌ హార్నెట్‌ విమానంలో ఒక ఇంజిన్‌ మొరాయించింది. దీంతో పైలట్‌ ఆ ఇంజిన్‌ను షట్‌డౌన్‌ చేసి మరో ఇంజిన్‌తో ల్యాండ్‌ అయ్యాడు. 

* డిసెంబర్‌ 31న సీఎంవీ 22బీ విమానం ఇంజిన్‌లో మంటలు చెలరేగాయి. ఇది కార్ల్‌ విన్సన్‌ డెక్‌పైనే చోటు చేసుకొంది. 

* ఇటీవల అత్యాధునిక ఎఫ్‌-35 కూలిపోయింది. 

భయపెడుతున్న చైనా చరిత్ర..

అమెరికా ఆయుధ శకలాలను సేకరించిన చరిత్ర చైనాకు ఉంది. గతంలో ఎఫ్‌-117 అనే అత్యాధునిక అమెరికా స్టెల్త్‌ విమానం 1999లో సెర్బియాలో కూలిపోయింది. ఆ విమాన శకలాలను చైనా సంపాదించి.. తాజాగా జే-20 స్టెల్త్‌ జెట్‌ను తయారు చేసింది. ఈ అనుభవం నుంచి అమెరికా ఇంకా బయటపడలేదు.

* పాకిస్థాన్‌లోని అబౌటాబాద్‌లో బిన్‌లాడెన్‌ ఇంటిపై అమెరికా దళాలు 2011లో దాడి చేశాయి. ఈ దాడికి రెండు స్టెల్త్‌ హెలికాప్టర్లను అమెరికా వినియోగించింది. వీటిల్లో ఒకటి పొరబాటున లాడెన్‌ ఇంటి కాంపౌడ్‌లో కూలిపోయింది. ఆ తర్వాత దానిని నుంచి చైనా నిపుణులు ఆన్‌బోర్డ్‌ పరికరాలు, సాఫ్ట్‌వేర్‌ను అపహరించినట్లు నిపుణులు చెబుతున్నారు. 

* యుకే సబ్‌మెరైన్‌ హెచ్‌ఎంఎస్‌ పొసైడాన్‌ మునిగిపోగా.. 2009లో చైనా దాని శకలాలను విజయవంతంగా చైనా సైన్యం దక్కించుకొంది.