Finland: ఫిన్లాండ్‌ ప్రధానికి డ్రగ్స్‌ టెస్ట్‌...ఫలితం ఏం తేలిందంటే..!

హెల్సింకి: మిత్రులతో కలిసి పార్టీ చేసుకున్నందుకు గానూ ఫిన్లాండ్(Finland) ప్రధాని సనా మారిన్‌(Sanna Marin) వివాదంలో చిక్కుకున్నారు. విపక్షాల విమర్శలతో ఆమె డ్రగ్స్ పరీక్ష చేయించుకోవాల్సి వచ్చింది. కాగా, ఇప్పుడు ఆ పరీక్షా ఫలితాలు వెలువడ్డాయి. 

పార్టీ వీడియో వైరల్ కావడంతో అందరి అనుమానాలు నివృత్తి  చేసేందుకు మారిన్ డ్రగ్స్ పరీక్ష చేయించుకున్నారు. ఆమె మూత్రం నమూనాలను పరీక్షించగా.. నెగెటివ్‌గా తేలింది. ‘ప్రధాని సనా మారిన్‌ నుంచి ఆగస్టు 19, 2022న నమూనాలు సేకరించాం. వాటిలో ఎలాంటి డ్రగ్స్ ఆనవాళ్లు కనిపించలేదు. నిబంధనలకు అనుగుణంగానే ఈ పరీక్ష జరిగింది’ అని ప్రధాని కార్యాలయం ప్రకటన విడుదల చేసింది. 

ఇటీవల మారిన్‌తో సహా ఆరుగురు మహిళలు డ్యాన్సులు చేస్తోన్న వీడియో సోషల్‌ మీడియాలో వైరల్‌గా మారింది. అందులో నేలపై మోకాళ్ల మీద కూర్చొని ఆమె ఓ పాటకు హుషారుగా డ్యాన్స్‌ చేస్తూ కనిపించారు. దీనిపై స్పందించిన ప్రతిపక్ష నేతలు.. ఆమె డ్రగ్స్‌ తీసుకున్నారేమోనని అనుమానాలు వ్యక్తం చేశారు. ఆమెకు పరీక్షలు నిర్వహించాలని డిమాండ్‌ చేశారు.

ఈ విమర్శలను ఇదివరకే మారిన్‌ తోసిపుచ్చి, విచారం వ్యక్తం చేశారు. ‘ఓ సాయంత్రం వేళ..  మిత్రులందరం కలిసి పార్టీ చేసుకున్నాం. ఆ సందర్భంగా డ్యాన్సులు, పాటలు పాడటం వాస్తవమే. ప్రైవేటుగా చేసుకున్న ఆ పార్టీ వీడియో లీక్‌ కావడం దురదృష్టకరం. కేవలం ఆల్కహాల్‌ తప్ప ఎటువంటి డ్రగ్స్‌ తీసుకోలేదు. నా జీవితంలో ఎన్నడూ నేను వాటిని వాడలేదు. మేం చేసినవన్నీ చట్టానికి లోబడినవే. మేం ఏ తప్పూ చేయలేదు’ అంటూ వివరణ ఇచ్చారు.