Azerbaijan-Armenia clash: మరోసారి భగ్గుమన్న నాగోర్నో-కరాబాఖ్‌‌..!

ఇంటర్నెట్‌డెస్క్‌: అజర్‌బైజన్‌-ఆర్మేనియా మధ్య నాగోర్నో-కరాబాఖ్‌ వివాదం మరోసారి భగ్గుమంది. ఆదివారం అజర్‌బైజన్‌ దళాలు, ఆర్మేనియాల మధ్య భీకరమైన కాల్పులు చోటు చేసుకొన్నాయి. ఈ దాడుల్లో కనీసం ఐదుగురు చనిపోయి ఉంటారని ఇరు దేశాల నుంచి నుంచి వెలువడిన నివేదికలు వెల్లడించాయి. నాగోర్నో-కరాబాఖ్‌ వద్ద గత 30 ఏళ్లలో అజర్‌బైజన్‌-ఆర్మేనియా దేశాలు రెండుసార్లు యుద్ధానికి తెగబడిన సంగతి తెలిసిందే. 

తాజాగా జరిగిన ఘర్షణల్లో ఇద్దరు సైనికులు చనిపోయినట్లు అజర్‌బైజన్‌ రక్షణ మంత్రిత్వ శాఖ వెల్లడించింది. ఆయుధాలు తీసుకెళుతున్నట్లు అనుమానిస్తున్న ఓ కాన్వాయ్‌ను తమ దళాలు అడ్డుకొన్న సమయంలో ఈ కాల్పులు జరిగాయని పేర్కొంది. ఈ కాన్వాయ్‌ అక్రమ రహదారులను వినియోగిస్తోందని వెల్లడించింది. 
ఈ వాదనను ఆర్మేనియా ప్రభుత్వం తీవ్రంగా వ్యతిరేకించింది. కరాబాఖ్‌ నుంచి కొందరు అధికారులు పత్రాలు, సర్వీస్‌ పిస్తోల్‌తో వస్తుండగా వారిని హత్య చేశారని పేర్కొంది. పైగా అక్రమ ఆయుధాలు తెస్తున్నారని ఆరోపించిందని పేర్కొంది. 

నగోర్నో-కరాబాఖ్‌ ప్రాంతాన్ని అంతర్జాతీయంగా అజర్‌బైజన్‌లోని భాగంగా గుర్తిస్తారు. కానీ, ఆ ప్రాంతంలో అత్యధికంగా ఆర్మేనియా వాసులు ఉన్నారు. 2020లో ఈ ప్రాంతంపై పట్టు కోసం ఆర్మేనియా-అజర్‌బైజన్‌లు దాదాపు ఆరు వారాల యుద్ధం చేసుకొన్నాయి. ఆ తర్వాత ఇరు దేశాల మధ్య శాంతి ఒప్పందం కుదిరింది. నాటి నుంచి రష్యా శాంతిసేనలు ఇక్కడ ఉన్నాయి. ఈ యుద్ధంలో టర్కీ సరఫరాచేసిన డ్రోన్లను అజర్‌బైజన్‌ వినియోగించి ఆర్మేనియాను భారీగా దెబ్బతీసింది.