నా మనవరాలు ఏం చేసిందని చంపేశారు..?

గాజాసిటీ: గాజా సరిహద్దులో కొద్దికాలంగా ఇజ్రాయెల్‌-పాలస్తీనా మధ్య చోటుచేసుకుంటోన్న ఉద్రిక్తతలు శుక్రవారం మరోసారి తీవ్రరూపం దాల్చాయి. ఈ క్రమంలో జరిగిన దాడుల్లో అభం శుభం తెలియని ఓ పసి ప్రాణం గాల్లో కలిసింది. నివాస భవనంపై జరిగిన వైమానిక దాడిలో ఐదేళ్ల అలా ఖదూమ్ మృత్యుఒడికి చేరుకుంది. ‘నా మనవరాలు నర్సరీలో చేరాలని కలలుకంది. బ్యాగ్‌, పుస్తకాలు సిద్ధం చేసుకుంటోంది. ఈ అమాయకురాలు రాకెట్లను ప్రయోగిస్తోందా..? దాడుల్లో పాల్గొంటుందా..? ఆమె ఏం చేసిందని చంపేశారు..?’ అంటూ ఆ చిన్నారి తాతయ్య రియాద్ కన్నీటి పర్యంతమయ్యారు.

ఇజ్రాయెల్ ప్రభుత్వం, పాలస్తీనా మిలిటెంట్లు పరస్పరం జరిపిన రాకెట్‌ దాడులతో రెండు దేశాల మధ్య మరోసారి యుద్ధమేఘాలు అలముకుంటున్నాయి. శుక్రవారం ఇజ్రాయెల్‌ యుద్ధ విమానాలు.. హమాస్‌ అధీనంలోని గాజాపై భీకరంగా విరుచుకుపడ్డాయి. ఈ దాడుల్లో 10 మంది మృతి చెందారని, 55 మందికి పైగా గాయాల పాలయ్యారని పాలస్తీనా అధికారులు తెలిపారు. గాజా సిటీలోని ఓ అపార్టుమెంట్‌ లక్ష్యంగా జరిగిన ఈ దాడిలో ఇస్లామిక్‌ జిహాదీ కమాండర్‌ అల్‌ జబారి చనిపోయారు. అలాగే ఆ పదిమంది మృతుల్లో ఐదేళ్ల చిన్నారి కూడా ఉంది. వెలుగులోకి వచ్చిన దృశ్యాల్లో ఆమె తలపై గాయమైనట్లు కనిపిస్తోంది. తమ బిడ్డ చేసిన తప్పేంటని ఎవరినీ ప్రశ్నించలేక.. అలా కుటుంబం కన్నీటితో అంత్యక్రియలకు ఏర్పాట్లు చేసింది.

కాగా, ఈ రాకెట్ల దాడులపై ఇజ్రాయెల్ ప్రధాని యాయిర్‌ లాపిడ్ స్పందించారు. గాజా సరిహద్దు వెంబటి రోజుల తరబడి ఉద్రికత్తలు కొనసాగుతున్నాయని, ఇస్లామిక్ జిహాద్ గ్రూప్‌ నుంచి పొంచి ఉన్న ముప్పును నిరోధించేక్రమంలో ఈ ఆపరేషన్ చేపట్టాల్సి వచ్చిందన్నారు. 2021లో మేలో 11 రోజుల పాటు గాజాపై భీకర దాడులు చోటుచేసుకున్న నేపథ్యంలో.. ప్రస్తుత దాడులతో ఆ పరిస్థితులు మరోసారి పునరావృతమవుతాయనే ఆందోళన వ్యక్తం అవుతోంది.