US Spelling Bee: అమెరికా స్పెల్లింగ్‌ బీ విజేతగా దేవ్‌షా..!

ఇంటర్నెట్‌డెస్క్‌: అమెరికాలో నిర్వహించిన 95వ నేషనల్‌ స్పెల్లింగ్‌ బీ (US Spelling Bee) పోటీల్లో భారత సంతతికి చెందిన 14 ఏళ్ల దేవ్‌షా విజేతగా నిలిచాడు. అతడు శామాఫైల్‌ (psammophile) అనే పదానికి స్పెల్లింగ్‌ చెప్పి 50 వేల డాలర్ల ప్రైజ్‌ మనీని గెలుచుకొన్నాడు. శామాఫైల్‌ అంటే ఇసుక నేలల్లో కనిపించే కనిపించే జీవి లేదా మొక్క అని అర్థం. ఈ పోటీల అనంతరం ట్రోఫీని అందుకొన్న తర్వాత దేవ్‌ మాట్లాడుతూ ‘‘ఇది నమ్మలేకపోతున్నాను.. ఇప్పటికీ నా కాళ్లు వణుకుతున్నాయి’’ అని పేర్కొన్నాడు. అతడి తల్లి మాట్లాడుతూ కుమారుడి విజయంపై గర్విస్తున్నట్లు పేర్కొన్నారు.

దేవ్‌ తండ్రి దేవల్‌ 29 ఏళ్ల క్రితం భారత్‌ నుంచి అమెరికా వలస వెళ్లి స్థిరపడ్డారు. ఆయనో సాఫ్ట్‌వేర్‌ ఇంజినీర్‌. ఈ సందర్భంగా దేవల్‌ మాట్లాడుతూ తన కుమారుడు మూడో ఏట నుంచే స్పెల్లింగ్‌ గుర్తుపెట్టుకొని చెప్పడం మొదలుపెట్టాడని పేర్కొన్నారు. ఆ తర్వాత ది నార్త్‌సౌత్‌ ఫౌండేషన్‌ నిర్వహించిన పోటీల్లో పాల్గొన్నాడని వెల్లడించారు. ఈ సంస్థ భారత్‌లో పిల్లలకు స్కాలర్‌షిప్‌లను అందిస్తుంది. 

గతంలో కూడా దేవ్‌ స్పెల్లింగ్‌ బీ  పోటీల్లో పాల్గొన్నాడు. 2019లో 51వ స్థానంలో.. 2021లో 76వ స్థానంతో సరిపెట్టుకొన్నాడు. ఈ సారి మాత్రం పోటీల్లో విజేతగా నిలిచి తన కలను నెరవేర్చుకొన్నాడు. ఇక ఈ పోటీల్లో రన్నరప్‌గా ఆర్లింగ్టన్‌ (వర్జీనియా)కు చెందిన 14ఏళ్ల బాలిక ఛార్లెట్‌ వాల్ష్‌ నిలిచారు. మొత్తం 231 మంది విద్యార్థులు ఈ పోటీల్లో పాల్గొన్నారు. వీరిలో 11 మంది ఫైనల్స్‌కు చేరుకొన్నారు.