America Shooting: అమెరికాలో మళ్లీ కాల్పుల కలకలం.. నలుగురి మృతి

ఒహైయో: అమెరికాలో వరుస కాల్పుల ఘటనలు అక్కడి ప్రజలను ఆందోళనకు గురిచేస్తున్నాయి. తాజాగా ఒహైయో రాష్ట్రంలోని ప్రముఖ నగరం డేటన్‌ సమీపాన ఉన్న బట్లర్‌ టౌన్‌షిప్‌ అనే చిన్న పట్టణంలో మరోసారి ఓ దుండగుడు కాల్పులు జరిపాడు. ఈ ఘటనలో నలుగురు మృతిచెందినట్లు పట్టణ పోలీసులు శుక్రవారం మీడియాకు వెల్లడించారు. సాయుధుడైన దుండగుడు కారులో సంచరిస్తూ శుక్రవారం మధ్యాహ్నం నుంచి వివిధ ప్రాంతాల్లో కాల్పులకు తెగబడినట్లు తెలిపారు. ప్రస్తుతం అతడి కోసం తీవ్రంగా గాలిస్తున్నారు. 

నిందితుడిని 39 ఏళ్ల స్టీఫెన్‌ మన్రోగా అనుమానిస్తున్నారు. దుండగుడు మారణాయుధాలతో ఉన్న నేపథ్యంలో ఎక్కడైనా కనిపించినా.. దగ్గరకు వెళ్లొద్దని పోలీసులు హెచ్చరించారు. అతడు ప్రయాణిస్తున్నట్లుగా చెబుతున్న కారుకు సంబంధించిన ఫొటోను పోలీసులు విడుదల చేశారు. దుండగుడు ఏ లక్ష్యంతో కాల్పులు జరిపాడన్నది ఇంకా స్పష్టత రాలేదని పోలీసు అధికారులు వెల్లడించారు. నిందితుడికి ఇండియానా పోలీస్‌, షికాగో, లెక్సింగ్టన్‌, కెంటకీ నగరాలతో కూడా సంబంధాలు ఉన్నట్లు గుర్తించామన్నారు. ఈ నేపథ్యంలో ఈ నగరాల్లో ఎక్కడో ఒక చోట ఉండి ఉంటారని అనుమానిస్తున్నారు. మన్రో ఇప్పటికే పలు కేసుల్లో శిక్ష అనుభవించి విడుదలైనట్లు పోలీసులు గుర్తించారు.