G 20 Summit: అధినేతల మధ్య వెల్లివిరిసిన ఆత్మీయత.. బాలిలో మోదీ, బైడెన్‌ ఆలింగనం..!

బాలి: ప్రధాని నరేంద్రమోదీ, అమెరికా అధ్యక్షుడు జో బైడెన్‌ మధ్య ఆత్మీయత వెల్లివిరిసింది. ఇండోనేషియాలోని బాలి వేదికగా జరుగుతోన్న జి-20 సదస్సులో భాగంగా వారిద్దరు ఆప్యాయంగా ఆలింగనం చేసుకున్నారు. ఈ చిత్రాన్ని ప్రధాన మంత్రి కార్యాలయం(PMO) ట్విటర్‌లో షేర్‌ చేసింది. 

‘బాలిలో జరుగుతోన్న జి-20 సదస్సులో భాగంగా ప్రధాని మోదీ, అధ్యక్షుడు బైడెన్‌ మధ్య ఆత్మీయ సంభాషణ చోటుచేసుకుంది’ అని పీఎంఓ పేర్కొంది. ఇదిలా ఉంటే.. నిన్న ఇండోనేషియా చేరుకున్న ప్రధానికి సంప్రదాయ స్వాగతం లభించింది. దీనిపై ఆయన సంతోషం వ్యక్తం చేశారు. జి-20 సమావేశ వేదిక వద్దకు చేరుకున్న ఆయనకు ఇండోనేషియా అధ్యక్షుడు జొకొ విడొడొ ఆహ్వానం పలికారు. ప్రపంచ ఆర్థిక వృద్ధిని తిరిగి పట్టాలెక్కించడం సహా ఇంధన, ఆహార భద్రత వంటి అంతర్జాతీయ అంశాలపై మోదీ ఈ సమావేశాల్లో ప్రధానంగా చర్చించనున్నారు. సమస్యలన్నింటినీ సమష్టిగా ఎదుర్కొనేందుకు భారత్‌ చిత్తశుద్ధితో కృషిచేస్తున్న సంగతిని అక్కడ వివరిస్తానని.. పలు రంగాల్లో మన దేశం సాధించిన విజయాలను చాటిచెప్తానని మోదీ పేర్కొన్నారు.