Gambia: ఇంటింటికీ తిరుగుతూ.. ఆ సిరప్‌లు వెనక్కి!

ఇంటర్నెట్‌ డెస్క్‌: ఆఫ్రికా దేశమైన గాంబియా(Gambia)లో దగ్గు, జలుబు సిరప్‌(Syrup)ల వినియోగంతో 66 మంది చిన్నారులు మృతి చెందిన విషయం తెలిసిందే. భారత్‌లో ఓ కంపెనీ తయారు చేసిన సిరప్‌ల వల్లే ఈ మరణాలు సంభవించాయని ప్రపంచ ఆరోగ్య సంస్థ(WHO) వెల్లడించింది. ఈ నేపథ్యంలో గాంబియా ప్రభుత్వం అప్రమత్తమైంది. సంబంధిత సిరప్‌లను అత్యవసరంగా రీకాల్‌ చేసింది. అధికారులు ఇంటింటికీ తిరుగుతూ.. వాటిని వెనక్కి తీసుకుంటున్నట్లు సమాచారం. ఈ క్రమంలోనే మైడెన్‌(Maiden) ఫార్మాస్యూటికల్స్‌ డైరెక్టర్‌ నరేశ్‌ కుమార్‌ గోయల్‌ ఓ వార్తాసంస్థతో మాట్లాడుతూ.. చిన్నారుల మరణాల గురించి గురువారం ఉదయం మాత్రమే సమాచారం అందినట్లు తెలిపారు. ఏం జరిగిందో తెలుసుకునేందుకు యత్నిస్తున్నట్లు చెప్పారు. భారత్‌లో తమ ఉత్పత్తులు విక్రయించడం లేదన్నారు.

1990లో తన కార్యకలాపాలను ప్రారంభించిన ఈ సంస్థ.. సిరప్‌లను తయారు చేసి, గాంబియాకు మాత్రమే ఎగుమతి చేసినట్లు సంబంధిత వర్గాలు తెలిపాయి. ఈ సంస్థకు హరియాణాలోని కుండ్లీ, పానిపట్‌లలో రెండు తయారీ ప్లాంట్‌లు ఉన్నాయి. ఇటీవలే మరొకటి ఏర్పాటు చేశారు. ఈ క్రమంలోనే హరియాణా ఆరోగ్య మంత్రి అనిల్ విజ్ మాట్లాడుతూ.. పూర్తిస్థాయి పరీక్షల కోసం సంబంధిత సిరప్‌ల శాంపిళ్లను సెంట్రల్ ఫార్మాస్యూటికల్ లేబొరేటరీకి పంపినట్లు వెల్లడించారు. ఏదైనా తప్పు జరిగినట్టు తేలితే కఠిన చర్యలు తీసుకుంటామని స్పష్టం చేశారు. ఈ వ్యవహారంపై కేంద్ర డ్రగ్స్‌ స్టాండర్డ్‌ కంట్రోల్‌ ఆర్గనైజేషన్‌ సైతం వెంటనే రంగంలోకి దిగినట్లు తెలిసింది. పూర్తి స్థాయి విచారణ చేపట్టినట్లు విశ్వసనీయ వర్గాలు తెలిపాయి.