అలారం హెచ్చరించినా..అగ్ని ప్రమాదాన్ని పసిగట్టని అపార్ట్‌మెంట్‌ వాసులు

న్యూయార్క్‌: అగ్రరాజ్యం అమెరికాలోని న్యూయార్క్‌లో ఆదివారం అగ్నిప్రమాదంలో 9 మంది చిన్నారులు సహా 19 మంది మరణించిన నేపథ్యంలో.. హెచ్చరిక అలారాల పాత్రపై చర్చ మొదలైంది. వాస్తవానికి ప్రమాదం సంభవించిన వెంటనే భవనంలోని అలారాలు మోగినా పెద్దగా పట్టించుకోనట్లు తెలుస్తోంది. ఇందుకు కారణం లేకపోలేదు. ఇటీవల కాలంలో అవి పదేపదే మోగుతుండడంతో బహుశా అలాగే మోగి ఉంటాయని భావించినట్లు సమాచారం. ప్రమాదం నుంచి బయటపడిన ఓ వ్యక్తి సైతం ఇదే అభిప్రాయం వ్యక్తం చేశారు. ‘‘భవనంలోని అలారాలు ఇటీవల తరచూ మోగేవి. అందువల్లే ఆదివారం అలారం మోగినా పెద్దగా పట్టించుకోలేదు’’ అని ఆయన చెప్పారు. మరోవైపు, నాలుగు రోజుల క్రితం ఫిలడెల్ఫియాలోని అపార్ట్‌మెంట్‌లో అగ్నిప్రమాదం సంభవించగా, ఎనిమిది మంది చిన్నారులు సహా 12 మరణించారు. 

‘తలుపులు మూయండి.. ప్రాణాలు కాపాడండి’

అగ్నిప్రమాదాలు సంభవించిన సమయంలో భవనం నుంచి బయటకు వచ్చేటప్పుడు వీలైనంత వరకు తలుపులు మూసివేయాలని అమెరికా అగ్నిమాపక విభాగం పౌరులకు పదేపదే విజ్ఞప్తి చేస్తోంది. ‘‘తలుపులు మూయండి.. ప్రాణాలు కాపాడండి’’ అంటూ సామాజిక మీడియాలో సందేశాలు సైతం ఉంచుతోంది. అలా చేస్తే ఒక ఫ్లాట్‌లో చెలరేగిన మంటలు మరో ఫ్లాట్‌కు వ్యాపించే అవకాశంతక్కువని అధికారులు చెబుతున్నారు.