లష్కరే ఉగ్రవాది మీర్‌కు 15ఏళ్ల జైలు

లాహోర్‌: ముంబయిలో 2008 నవంబరు 26న జరిగిన ఉగ్రదాడి (26/11 దాడి) ఘటనలో ప్రధాన నిందితుడైన నిషేధిత లష్కరే తోయిబా ఉగ్రవాది సాజిద్‌ మజీద్‌ మీర్‌కు 15ఏళ్ల జైలుశిక్ష పడింది. ఉగ్రవాద సంస్థలకు నిధులు సమకూర్చిన కేసులో పాకిస్థాన్‌లోని లాహోర్‌ యాంటీ టెర్రరిజం కోర్టు ఈ శిక్ష విధించింది. రూ.4 లక్షల జరిమానా కూడా విధించింది. కేసు విచారణలో భాగంగా ఈ ఏడాది ఏప్రిల్‌లో అరెస్ట్‌ అయినప్పటి నుంచి లాహోర్‌లోని కోట్‌లఖ్‌పత్‌ జైల్లో మీర్‌ ఉన్నాడని అతడి తరఫు న్యాయవాది తెలిపారు. వాస్తవానికి మీర్‌ చనిపోయినట్లు పాకిస్థాన్‌ గతంలో ప్రకటించినప్పటికీ పశ్చిమ దేశాలు నమ్మలేదు. మృతి చెందినట్లు ఆధారాలు చూపాలని పట్టుబట్టాయి. భారత్‌ మోస్ట్‌వాంటెడ్‌ ఉగ్రవాదుల జాబితాలోనూ మీర్‌ ఉన్నాడు.  40 ఏళ్ల సాజిద్‌పై అమెరికా గతంలోనే 50 లక్షల డాలర్ల నజరానా ప్రకటించింది. మరోవైపు, సాజిద్‌ను అరెస్ట్‌ చేసినందున తమను గ్రే లిస్టు నుంచి తొలగించాలని పాకిస్థాన్‌ కోరినట్లు స్థానిక మీడియా తెలిపింది.

* 2005లో నకిలీ పాస్‌పోర్టుతో భారత్‌కు వచ్చి వెళ్లిన సాజిద్‌.. 2008 నవంబరు 11న పాకిస్థాన్‌ నుంచి సముద్ర మార్గం గుండా పది మంది ఉగ్రవాదులతో కలిసి ముంబయి చేరుకున్నాడు. అనంతరం నగరంలోని 12 ప్రాంతాలపై దాడి చేసి 166 మంది పౌరులను పొట్టన పెట్టుకున్నాడు. ఈ నరమేధంలో ఆరుగురు అమెరికా పౌరులు కూడా మృతిచెందారు. అంతకుముందు ముంబయి పేలుళ్ల ఘటనలో ప్రధాన సూత్రధారి అయిన హఫీజ్‌ సయీద్‌కు లాహోర్‌ ఉగ్రవాద నిరోధక న్యాయస్థానం 68 ఏళ్ల జైలు శిక్ష విధించింది. అతడు ప్రస్తుతం శిక్ష అనుభవిస్తున్నాడు. లష్కరేతొయిబా అనుబంధ సంస్థగా పనిచేస్తున్న జేయూడీని విదేశీ ఉగ్రవాద సంస్థగా 2014లోనే అమెరికా గుర్తించింది. సయీద్‌ను అంతర్జాతీయ ఉగ్రవాదిగా ప్రకటించిన అగ్రరాజ్యం.. అతని ఆచూకీ తెలిపిన వారికి కోటి డాలర్ల బహుమతి ఇస్తామని తెలిపింది.