అమెరికాలో మళ్లీ తుపాకీ కాల్పుల మోత

రెండు ఘటనల్లో 9 మంది మృతి

హాఫ్‌మూన్‌ బే, డెస్‌మోయిన్‌: వరస తుపాకీ కాల్పులతో కాలిఫోర్నియా రాష్ట్రం దద్దరిల్లుతోంది. ఇక్కడి మాంటెరరీ పార్కులో శనివారం చోటుచేసుకున్న విషాదాన్ని మరిచిపోక ముందే కాల్పులు మరోసారి అలజడి సృష్టించాయి. ఉత్తర కాలిఫోర్నియాలోని శాన్‌ఫ్రాన్సిస్కో సమీప హాఫ్‌మూన్‌ బే నగరంలో రెండు వ్యవసాయ వ్యాపార ప్రదేశాల్లో దుండగుడు కాల్పులు జరపడంతో ఏడుగురు మరణించారు. ఈ ఘటనకు సంబంధించి అనుమానితుడు చున్లీ జావ్‌ (67)ను పోలీసులు అదుపులోకి తీసుకున్నారు.

అయోవా రాష్ట్రంలో మరో ఘటన

అయోవా రాష్ట్రంలోని డెస్‌మోయిన్‌ నగరంలో జరిగిన మరో కాల్పుల ఘటనలో ఇద్దరు విద్యార్థులు ప్రాణాలు కోల్పోయారు. ఇక్కడ జరుగుతున్న ఓ విద్యా సంబంధ కార్యక్రమంలో ఈ ఘటన జరిగింది. కార్యక్రమ నిర్వాహకుడు విలియమ్‌ హోమ్స్‌కు కాల్పుల్లో తీవ్ర గాయాలయ్యాయి.