గర్భస్థ శిశువులపైనా కొవిడ్‌ ప్రభావం

లండన్‌: మొదటి దశల్లో కొవిడ్‌ సోకిన గర్భిణులలో.. పిండంతో పాటు మాయ సైతం తీవ్రంగా ప్రభావితమైందని, గర్భస్థ శిశువు ఎదుగుదల, మెదడు, ఇతర అవయవాలకు ముప్పు వాటిల్లిందని తాజా పరిశోధనలో వెల్లడైంది. ముఖ్యంగా ఒమిక్రాన్‌ కంటే ముందు వచ్చిన ఉపరకాల వల్ల నష్టం ఎక్కువగా ఉంది. అక్కడక్కడ మాయ విడిపోవడంతో గర్భంలో ఉన్న శిశువు ఎదుగుదల, ఆరోగ్యం దెబ్బతిన్నట్లు ‘ద లాన్సెట్‌ రీజనల్‌ హెల్త్‌-యూరప్‌ పత్రిక’లో ప్రచురితమైన పరిశోధనలో వెల్లడించారు.మొత్తం 76 మంది గర్భిణుల పిండాలు, మాయకు ఆస్ట్రియాలోని వియన్నా మెడికల్‌ యూనివర్సిటీ పరిశోధకులు ఎంఆర్‌ఐ చేశారు. వీరిలో 38 మందికి కొవిడ్‌ సోకగా, మిగిలిన 38 మంది ఆరోగ్యంగా ఉన్నారు. డెల్టా లాంటి వేరియంట్లు సోకినవారి పిండాలకు రక్తనాళాల్లో రక్తం గడ్డకట్టడం లాంటి ఇబ్బందులున్నాయని పరిశోధనకు నేతృత్వం వహించిన పాట్రిక్‌ కీనాస్ట్‌ తెలిపారు.