2021లో 29 శాతానికి పెరిగిన ఆహార అభద్రత

ఐరాస ఆహార- వ్యవసాయ సంస్థ నివేదిక

బ్యాంకాక్‌: ఆసియాలో పెరుగుతున్న జనాభా, పేదరికం, అధిక ధరలు.. తినడానికి చాలినంత లేకపోవడం తదితర కారణాలతో ఆహార అభద్రత భారీగా పెరిగిందని ఐరాసకు చెందిన ఆహార-వ్యవసాయ సంస్థ నివేదిక వెల్లడించింది. ప్రపంచవ్యాప్తంగా 2021లో ఆహార అభద్రత 29శాతానికి పైగా పెరిగిందని పేర్కొంది. 2014లో ఇది 21 శాతమేనని వెల్లడించింది. ‘‘కొవిడ్‌-19 కారణంగా పెద్దసంఖ్యలో ఉద్యోగాలు పోవడం, ఇతర అవాంతరాలు, ఉక్రెయిన్‌-రష్యా యుద్ధం తదితర కారణాలతో ఆహారం, విద్యుత్తు, ఎరువుల ధరల పెరిగాయి. దీంతో కోట్ల మందికి చాలినంత ఆహారం అందని పరిస్థితి ఏర్పడింది. ఆ ఏడాది.. దాదాపు 50 కోట్ల మంది పోషకాహార కొరత ఎదుర్కొన్నారు. బాధితుల్లో ప్రతి 10 మందిలో 8 మంది దక్షిణాసియావాసులే. మరో 100 కోట్ల మంది మధ్యస్థం నుంచి తీవ్రంగా ఆహార అభద్రతను ఎదుర్కొన్నారు. కరోనా తర్వాత సంవత్సరాల్లో ఆకలి, పోషకాహార లోపం నివారణ కార్యక్రమాలు నిలిచిపోవడమూ ప్రభావం చూపింది’’ అని నివేదిక పేర్కొంది.  ‘‘ఆసియాలో 15-49 మధ్య వయసు మహిళల్లో మూడో వంతు మంది రక్తహీనత సమస్యను ఎదుర్కొంటున్నారు’’ అని వెల్లడించింది.