ఉద్యోగాలు కోల్పోతున్న వారి పరిస్థితిని అధ్యక్షుడు అర్థం చేసుకోగలరు

శ్వేతసౌధం స్పందన

వాషింగ్టన్‌: గూగుల్‌, అమెజాన్‌, మైక్రోసాఫ్ట్‌ వంటి దిగ్గజ కంపెనీలు తమ సిబ్బందిపై లేఆఫ్‌ల అస్త్రం సంధిస్తున్న తరుణంలో అమెరికా అధ్యక్ష కార్యాలయం స్పందించింది. ఓ వ్యక్తి ఉద్యోగం కోల్పోతే ఆ కుటుంబంపై నేరుగా పడే ప్రభావం ఏమిటో అధ్యక్షుడు జో బైడెన్‌ అర్థం చేసుకోగలరని శ్వేతసౌధం ప్రెస్‌ సెక్రటరీ కరీన్‌ జీన్‌ పియరే తెలిపారు. సాఫ్ట్‌వేర్‌ కంపెనీలు విధిస్తున్న లేఆఫ్‌ల గురించి విలేకరులు ప్రశ్నించగా.. ఆమె ఈ మేరకు సమాధానం ఇచ్చారు. దేశ ఆర్థిక వ్యవస్థ పునరుత్థానానికి బైడెన్‌ అన్ని చర్యలూ తీసుకుంటారని హామీ ఇచ్చారు. ప్రస్తుతం అమెరికాలో భారతీయులు భారీ సంఖ్యలో ఉద్యోగాలు కోల్పోతున్నారు. హెచ్‌-1బీ వీసా నిబంధనల్లో సానుకూలంగా స్పందించాలని తాజాగా ఫౌండేషన్‌ ఫర్‌ ఇండియన్‌ డయాస్పొరా స్టడీస్‌ (ఎఫ్‌ఐఐడీఎస్‌).. అమెరికా అధ్యక్షుడు బైడెన్‌, కాంగ్రెస్‌ సభ్యులకు మొర పెట్టుకుంది. హెచ్‌-1బీ వీసాల పొడిగింపు విషయంలో ఐటీ ఉద్యోగులు ఎదుర్కొంటున్న ఇబ్బందులపై కరీన్‌ జీన్‌ స్పందించలేదు.