ద.కొరియా, జపాన్‌ల మధ్య నీట మునిగిన కార్గో నౌక

ఇద్దరి మృతి.. 8 మంది గల్లంతు

సియోల్‌: దక్షిణ కొరియా-జపాన్‌ మధ్య సరకు రవాణా నౌక బుధవారం తెల్లవారుజామున సాగర జలాల్లో మునిగిపోయింది. జిన్‌ టియాన్‌ అనే ఈ నౌకలో చైనా, మయన్మార్‌లకు చెందిన 22 మంది సిబ్బంది ఉండగా వారిలో ఇద్దరు మృతి చెందారు. తీర రక్షకదళ సిబ్బంది 14 మందిని రక్షించారు. వీరిలో అపస్మారక స్థితిలో ఉన్న 9 మందిని చికిత్స నిమిత్తం విమానాల్లో జపాన్‌కు తరలించారు. తీర రక్షక నౌకలు, విమానాలతో పాటు రెండు వాణిజ్య నౌకలు రంగంలోకి దిగినా, బలమైన గాలులు వీస్తుండటం, జలాలు అల్లకల్లోలంగా ఉండటం వంటి ప్రతికూల పరిస్థితులతో గాలింపు చర్యలకు అవరోధాలు ఎదురవుతున్నాయి. 6,551 టన్నుల బరువున్న ఈ నౌక.. కలప దుంగలతో వెళ్తోంది. పరిస్థితి ప్రమాదకరంగా ఉందంటూ మంగళవారం రాత్రి 11.15 గంటల ప్రాంతంలో నౌక నుంచి కాల్‌ వచ్చిందని, మూడున్నర గంటల అనంతరం నౌక మునిగిపోయిందని తీర రక్షక దళం అధికార ప్రతినిధి తెలిపారు. నౌక ఎలా మునిగిపోయిందీ తెలియరాలేదు. మరో నౌకను ఢీకొన్నట్లు ఆనవాళ్లు లేవు.