Bill Gates: వంటవాడిగా బిల్‌గేట్స్‌.. రోటీ తయారీ!

దిల్లీ: అపర కుబేరుడైన వ్యాపారవేత్త, మైక్రోసాఫ్ట్‌ సహ వ్యవస్థాపకుడు బిల్‌గేట్స్‌ వంటవాడి అవతారమెత్తి మన రోటీ తయారుచేశారు. బిల్‌గేట్స్‌తో కలిసి ప్రముఖ సెలబ్రిటీ చెఫ్‌ ఐటన్‌ బెర్నాత్‌ ఓ కుకరీ వీడియో చేశారు. ఇందులో గేట్స్‌ భారతీయ వంటకమైన రోటీ తయారీకి గోధుమపిండి కలిపి చపాతీ చేసి కాల్చారు. తర్వాత ఇద్దరూ ఆ రోటీలను రుచి చూశారు. ఈ వీడియోను గేట్స్‌ తన ఇన్‌స్టాగ్రామ్‌లో పోస్ట్‌ చేశారు. ‘‘ఐటన్‌ ఇటీవల భారత్‌లో పర్యటించి వచ్చారు. బిహార్‌లో గోధుమ రైతులను కలిసి వారి నుంచి ఎన్నో విషయాలు తెలుసుకున్నాడు. ‘దీదీ కీ రసోయీ’ కమ్యూనిటీ క్యాంటిన్‌లోని మహిళలను కలిసి రోటీలు ఎలా చేయాలో నేర్చుకున్నాడు’’ అని గేట్స్‌ రాసుకొచ్చారు. ఈ వీడియో కాస్తా సామాజిక మాధ్యమాల్లో వైరల్‌గా మారింది.

చిరుధాన్యాల వంటకాలు కూడా చేయండి : మోదీ

బిల్‌గేట్స్‌ వీడియోను ప్రధానమంత్రి నరేంద్ర మోదీ శనివారం తన ఇన్‌స్టా స్టోరీస్‌లో పోస్ట్‌ చేస్తూ టెక్‌ దిగ్గజంపై ప్రశంసలు కురిపించారు. ‘‘సూపర్‌. ఇప్పుడు భారత్‌లో తృణధాన్యాల (మిల్లెట్స్‌) హవా నడుస్తోంది. అవి ఆరోగ్యానికి ఎంతో మంచివి కూడా. వీటితోనూ ఎన్నో వంటకాలు చేయొచ్చు. ఈసారి తృణధాన్యాలు ట్రై చేయండి’’ అని గేట్స్‌కు సూచిస్తూ నవ్వుతున్న ఎమోజీని జత చేశారు.