క్యాన్సర్‌ రోగులకు దీర్ఘకాల కొవిడ్‌

వాషింగ్టన్‌: క్యాన్సర్‌ రోగుల్లో సగం మందికిపైగా కొవిడ్‌ సోకిన తర్వాత ఆరు నెలల వరకు దీర్ఘకాల కొవిడ్‌తో బాధపడుతున్నట్లు అమెరికాలో జరిగిన ఒక అధ్యయనం తేల్చింది. క్యాన్సర్‌ చికిత్స పొందుతున్న పురుషుల కంటే స్త్రీలు ఎక్కువగా దీనికి గురవుతున్నారు. క్యాన్సర్‌ రోగుల్లో 10 నుంచి 87 శాతం మందిలో ఈ లక్షణాలు కనిపిస్తున్నాయి. వీరిలోనూ తీవ్ర కొవిడ్‌తో ఆస్పత్రి పాలైనవారిలో మాత్రమే 30 రోజులకుపైగా దీర్ఘకాల కొవిడ్‌ లక్షణాలు కనిపిస్తున్నాయి. టెక్సాస్‌ విశ్వవిద్యాలయ పరిశోధక బృందం ఎంచుకున్న 312 మంది క్యాన్సర్‌ రోగుల్లో 188 మంది దీని బారిన పడ్డారు. తీవ్ర అలసట, నిద్రలేమి, కండరాల నొప్పులు, జీర్ణకోశ రుగ్మతలు వంటివి దీర్ఘకాల కొవిడ్‌ లక్షణాలు. అధిక రక్తపోటుకు గురయ్యేవారిలో మాత్రం ఈ లక్షణాలు కనిపించకపోవడం ఆశ్చర్యకరం.