Video games: వీడియో గేమ్స్‌తో పిల్లల విజ్ఞాన సముపార్జన దెబ్బతినదు

హ్యూస్టన్‌ విశ్వవిద్యాలయ పరిశోధకుల తాజా అధ్యయనం వెల్లడి

వాషింగ్టన్‌: మీ పిల్లలు విపరీతంగా వీడియో గేమ్స్‌ ఆడుతున్నారా. మరేం పర్వాలేదు. వీడియో గేమ్స్‌ ఆడటం వల్ల బాలల గ్రహణ శక్తి తగ్గడం, విజ్ఞాన సముపార్జన దెబ్బతినడం లేదా మెరుగుపడటం లాంటివి జరగవని అమెరికాలోని హ్యూస్టన్‌ విశ్వవిద్యాలయ పరిశోధకులు తేల్చారు. కొందరిలో ఈ గేమ్స్‌ గ్రహణ శక్తిని మెరుగుపరిచినా.. యవ్వన వయసు వారిపై మాత్రం ఎలాంటి ప్రభావం చూపించలేదని తెలిపారు. వివిధ పాఠశాలల్లో చదువుతున్న 160మంది యవ్వన వయసు వారికి భాషా, గణిత సామర్థ్యాలు అంచనా వేసే కాగ్‌ ఏటీ పరీక్ష జరిపారు. ఈ బాలలు రోజుకు సగటున రెండున్నర గంటలసేపు వీడియో గేమ్స్‌ ఆడతామని చెప్పారు. కొంతమంది నాలుగున్నర గంటలు అని చెప్పారు. అయినా వారి గ్రహణ శక్తి, సామర్థ్యాలు మెరుగ్గా ఉన్నాయి. అదే పనిగా వీడియో గేమ్స్‌ ఆడటం వల్ల పిల్లల్లో అటు గ్రహణ శక్తి మెరుగుపడటం గానీ, సామర్థ్యాలు తగ్గడం గానీ ఉండదని అధ్యయనం తెలిపింది.