Cancer: ప్రాసెస్డ్‌ ఆహారంతో క్యాన్సర్‌ ముప్పు

లండన్‌: తీవ్రస్థాయిలో ప్రాసెస్‌ చేసిన ఆహారాన్ని ఎక్కువగా తీసుకోవడం వల్ల క్యాన్సర్‌ బారినపడే, ఆ వ్యాధితో మరణించే ముప్పు పెరుగుతుందని బ్రిటన్‌ శాస్త్రవేత్తల అధ్యయనంలో తేలింది. ఈ తరహా ఆహార పదార్థాలను ఉత్పత్తి సమయంలో భారీగా ప్రాసెస్‌ చేస్తారు. శీతల పానీయాలు, పలు రకాల ప్యాకేజ్డ్‌ ఆహార పదార్థాలు ఈ కోవలోకి వస్తాయి. వీటిలో ఉప్పు, కొవ్వు, చక్కెర, రసాయనాలు ఎక్కువే. వీటివల్ల ఊబకాయం, టైప్‌-2 మధుమేహం, గుండె జబ్బులు వచ్చే ప్రమాదం ఉందని ఇప్పటికే వెల్లడైంది. ఈ నేపథ్యంలో ఇంపీరియల్‌ కాలేజీ పరిశోధకులు నడి వయసులో ఉన్న 2లక్షల మందికి సంబంధించిన డేటాను విశ్లేషించారు. పదేళ్లపాటు ఈ పరిశీలన సాగింది. తీవ్రస్థాయిలో ప్రాసెస్‌ చేసిన ఆహారాన్ని తీసుకున్నవారికి క్యాన్సర్‌ ముప్పు ఎక్కువని ఇందులో వెల్లడైంది. ముఖ్యంగా అండాశయ, రొమ్ము క్యాన్సర్ల బారినపడే అవకాశం ఎక్కువని తేలింది. ఈ తరహా తినుబండారాలను భుజించడం 10 శాతం పెరిగితే.. క్యాన్సర్‌ ముప్పు 2 శాతం పెరగొచ్చని శాస్త్రవేత్తలు తెలిపారు. ఈ వ్యాధితో మరణించే ముప్పు కూడా 6 శాతం పెరుగుతుందని వివరించారు.