పాకిస్థాన్‌కు అప్పు పుట్టింది

70 కోట్ల డాలర్లివ్వడానికి ముందుకొచ్చిన చైనా

ఇస్లామాబాద్‌: తీవ్ర ఆర్థిక సంక్షోభంలో కొట్టుమిట్టాడుతూ అప్పు కోసం ప్రపంచ దేశాలన్నింటివైపు ఆశగా ఎదురుచూస్తున్న పాకిస్థాన్‌కు ఎట్టకేలకు 70 కోట్ల డాలర్ల రుణం దొరికింది. ప్రస్తుత పరిస్థితుల్లో ఆ దేశానికిది భారీ సాయమే. చిత్రమేంటంటే సీపెక్‌ పేరుతో పాక్‌ను అప్పుల ఊబిలోకి నెట్టిన చైనాయే ఈ రుణం అందించడానికి ముందుకు రావడం. ‘‘చైనా డెవలప్‌మెంట్‌ బ్యాంకు ద్వారా ఈ వారం 70 కోట్ల డాలర్లు మన స్టేట్‌ బ్యాంకు ఖాతాలో పడనున్నాయి’’ అని పాక్‌ ఆర్థికమంత్రి ఇషాక్‌ దర్‌ బుధవారం ట్వీట్‌ చేశారు. పాకిస్థాన్‌ విదేశీ మారకద్రవ్య నిధులు అడుగంటిపోతున్నాయి. ఇప్పుడు ఆ దేశం దగ్గర మూడు వారాల దిగుమతులకు సరిపడా డాలర్లు మాత్రమే ఉన్నాయి. అంతర్జాతీయ ద్రవ్యనిధి (ఐఎంఎఫ్‌)సంస్థ ఇస్తానన్న 1.1 బిలియన్‌ డాలర్ల రుణంపై ఇంకా తుదినిర్ణయం వెలువడలేదు. ఐఎంఎఫ్‌ కరుణిస్తే.. మిగతా దేశాలు కూడా అప్పులివ్వడానికి ముందుకొస్తాయని పాకిస్థాన్‌ భావిస్తోంది. ఈ నేపథ్యంలో చైనా రుణ ప్రకటన పాక్‌కు ఊరటే.