ఆస్ట్రేలియాకు 220 టోమహాక్‌ క్షిపణులు

అమెరికా నిర్ణయం   
చైనాకు చెక్‌ పెట్టేందుకే..

వాషింగ్టన్‌: ఆస్ట్రేలియాకు 220 టోమహాక్‌ దీర్ఘశ్రేణి క్రూజ్‌ క్షిపణులను సరఫరా చేయనున్నట్లు అమెరికా వెల్లడించింది. ఇప్పటికే ఆ దేశానికి అణు జలాంతర్గాములను సమకూర్చాలని ‘ఆకస్‌’ (ఆస్ట్రేలియా, బ్రిటన్‌, అమెరికా) కూటమి నిర్ణయం తీసుకొన్న నేపథ్యంలో దీనికి ప్రాధాన్యం ఏర్పడింది. టోమహాక్‌ క్షిపణులను సబ్‌మెరైన్లు, యుద్ధనౌకల్లో వినియోగించే అవకాశం ఉంది. చైనాను లక్ష్యంగా చేసుకొని ఈ ఆయుధాలను అగ్రరాజ్యం సరఫరా చేస్తోంది. ‘‘ఈ క్షిపణి విక్రయాలతో అమెరికా, ఇతర మిత్రదేశాల దళాలతో ఆస్ట్రేలియా సమన్వయం చేసుకొంటూ..ఉమ్మడి ప్రయోజనాలను కాపాడే ఆపరేషన్లను విజయవంతంగా చేయగలదు’’ అని అమెరికా రక్షణ భద్రత సహకార సంస్థ ఒక ప్రకటనలో పేర్కొంది. ఈ ఒప్పందం విలువ 89.5 కోట్ల డాలర్లు అని తెలిపింది. 2033 నాటికి తమకు మూడు వర్జీనియా శ్రేణి జలాంతర్గాములు అందుతాయని ఆస్ట్రేలియా రక్షణ మంత్రి పాట్‌ కాన్రే తెలిపారు. అప్పటికి టోమహాక్‌ క్షిపణులూ అందుబాటులో వస్తాయన్నారు.