21న నన్ను అరెస్టు చేస్తారు: ట్రంప్‌

న్యూయార్క్‌: తనతో లైంగిక సంబంధాలున్నాయని ఆరోపించిన మహిళను డబ్బులతో ప్రలోభపెట్టినట్లు వచ్చిన అభియోగాల నేపథ్యంలో ఈ నెల 21న తనను అరెస్టు చేసే అవకాశాలున్నాయని అమెరికా మాజీ అధ్యక్షుడు డొనాల్డ్‌ ట్రంప్‌ అనుమానం వ్యక్తంచేశారు. ‘ట్రూత్‌ సోషల్‌’ నెట్‌వర్క్‌లో ఈ మేరకు ఆయన శనివారం పోస్ట్‌ చేశారు. మన్‌హట్టన్‌ జిల్లా అటార్నీ కార్యాలయం నుంచి అనధికారికంగా వచ్చిన సమాచారం ప్రకారం తాను అరెస్టు అయ్యేలా ఉన్నానని చెప్పారు. గతసారి అధ్యక్ష ఎన్నికల్లో ఫలితాన్ని జో బైడెన్‌ దొంగిలించుకుపోయారని మరోసారి ఆరోపిస్తూ- దేశాన్ని మళ్లీ మునుపటి స్థితికి తెచ్చేందుకు నిరసనలు తెలపాలని అనుచరులకు విజ్ఞప్తిచేశారు. లైంగిక సంబంధాల ఆరోపణల్ని ట్రంప్‌ ఇదివరకే తోసిపుచ్చారు.