5 కేసుల్లో ఇమ్రాన్‌ బెయిల్‌ పొడిగింపు

లాహోర్‌: పాకిస్థాన్‌ మాజీ ప్రధానమంత్రి ఇమ్రాన్‌ఖాన్‌ (70)కు అయిదు ఉగ్రవాద కేసుల్లో గతంలో ఇచ్చిన ముందస్తు బెయిలు గడువును మార్చి 27 దాకా పొడిగిస్తూ లాహోర్‌ హైకోర్టు ఆదేశాలు జారీ చేసింది. శుక్రవారం పటిష్ఠమైన బందోబస్తు మధ్య ద్విసభ్య ధర్మాసనం ముందు ఇమ్రాన్‌ హాజరయ్యారు. ‘‘నా జీవితం ప్రమాదంలో ఉంది. కోర్టు ఆదేశాలు పట్టించుకోకుండా పంజాబ్‌ పోలీసులు లాహోర్‌లోని నా నివాసంపై దాడి చేసి బీభత్సం సృష్టించారు’’ అని ఇమ్రాన్‌ కోర్టుకు నివేదించారు. ఆయన వాదన విన్న న్యాయమూర్తులు పంజాబ్‌ ప్రావిన్సు ప్రభుత్వానికి, పంజాబ్‌ పోలీస్‌ ఐజీకి నోటీసుల జారీకి ఆదేశించారు. గతేడాది ఏప్రిల్‌లో పాకిస్థాన్‌ ముస్లింలీగ్‌ ఆధ్వర్యంలోని ప్రభుత్వం ఏర్పడ్డాక పాక్‌లోని వివిధ పోలీస్‌స్టేషన్లలో ఇమ్రాన్‌పై మొత్తం 143 కేసులు నమోదయ్యాయి.