సంక్షిప్త వార్తలు (2)

అమెరికా చాక్లెట్‌ పరిశ్రమలో పేలుడు
ఐదుగురి దుర్మరణం.. మరో ఆరుగురి గల్లంతు

వెస్ట్‌ రీడింగ్‌(అమెరికా): అమెరికా పెన్సిల్వేనియాలోని చాక్లెట్‌ పరిశ్రమలో శుక్రవారం సాయంత్రం పేలుడు సంభవించి ఐదుగురు మరణించారు. మరో ఆరుగురు గల్లంతయ్యారు. ఆర్‌ఎం పామెర్‌ కంపెనీ ప్లాంటులో ఈ ప్రమాదం జరిగింది. పేలుడు తీవ్రతకు ఒక భవనం నేలమట్టమవడంతో పాటు పక్కనున్న మరో భవనం, అపార్టుమెంట్లు ధ్వంసమయ్యాయి.

బెలారస్‌లో అణ్వాయుధాల్ని మోహరిస్తాం: పుతిన్‌

మాస్కో: వ్యూహాత్మక అణ్వాయుధాల్ని తమ పొరుగుదేశం బెలారస్‌లో మోహరిస్తామని రష్యా అధ్యక్షుడు పుతిన్‌ శనివారం ప్రకటించారు. యురేనియంతో కూడిన ఆయుధ సామగ్రిని ఉక్రెయిన్‌కు సరఫరా చేస్తామని బ్రిటన్‌ వారం రోజులుగా ప్రకటిస్తున్నందున తాము ఈ నిర్ణయానికి వచ్చామని రష్యన్‌ టెలివిజన్‌లో మాట్లాడుతూ పుతిన్‌ చెప్పారు. బెలారస్‌లో అణ్వాయుధాల నిల్వకు సంబంధించిన ఏర్పాట్లు జులై ఒకటోతేదీ కల్లా పూర్తవుతాయని వివరించారు.