అమెరికాలో ఖలిస్థాన్‌ మద్దతుదారుల వీరంగం

భారత పాత్రికేయుడిపై దాడి
వాషింగ్టన్‌లోని రాయబార కార్యాలయంలో చొరబాటుకు యత్నం

వాషింగ్టన్‌: అమెరికాలో ఖలిస్థాన్‌ మద్దతుదారులు వీరంగం సృష్టించారు. శనివారం ఇక్కడి భారత రాయబార కార్యాలయం ఎదుట ఆందోళన నిర్వహిస్తూ.. హింసను ప్రేరేపించే ప్రసంగాలు చేశారు. భారత రాయబారి తరణ్‌జీత్‌సింగ్‌ సంధూను అసభ్యకరపదజాలంతో దూషించారు. రాయబార కార్యాలయ ప్రాంగణంలోకి చొరబడేందుకు ప్రయత్నించారు. భారత్‌కు చెందిన పీటీఐ పాత్రికేయుడు లలిత్‌ కుమార్‌ ఝాపైనా ఆందోళనకారులు భౌతికంగా దాడికి దిగారు. ఆ సమయంలో అమెరికా సీక్రెట్‌ సర్వీసు అధికారులు జోక్యం చేసుకొని ఆందోళనకారులను వెనక్కి నెట్టారు. ఒకానొక సమయంలో రాయబార కార్యాలయంలోని మువ్వన్నెల జెండాను లాగేందుకు ప్రయత్నించారు. ఆ ప్రయత్నాన్ని స్థానిక పోలీసులు వమ్ము చేశారు.

కెనడా హైకమిషనర్‌కు సమన్లు

దిల్లీ: కెనడా హైకమిషనర్‌ కామెరూన్‌ మెక్‌కేను శనివారం విదేశీ వ్యవహారాలశాఖ పిలిపించింది. ఇటీవల కెనడాలో భారత దౌత్యకార్యాలయాల ముందు ఖలిస్థాన్‌ మద్దతుదారుల నిరసనలు.. వారిని స్థానిక పోలీసులు నియంత్రించకపోవడాన్ని మెక్‌కే దృష్టికి తీసుకొచ్చారు. ఈ సందర్భంగా విదేశీవ్యవహారాలశాఖ అధికారులు తమ తీవ్ర నిరసన వ్యక్తం చేశారు. భవిష్యత్తులో ఇలాంటివి జరగకుండా జాగ్రత్తలు తీసుకోవాలన్నారు.