తైవాన్‌తో తెగదెంపులు.. చైనాతో హోండురస్‌ దోస్తీ

బీజింగ్‌: తైవాన్‌తో దశాబ్దాలుగా ఉన్న సంబంధాలను తెంచుకుని చైనాతో దౌత్య సంబంధాలను ఏర్పాటు చేసుకుంటున్నట్లు హోండురస్‌ ప్రకటించింది. చైనాలో అంతర్భాగంగానే తైవాన్‌ ఉందనీ, అందువల్ల ఇకపై తైవాన్‌తో ఎలాంటి అధికారిక సంప్రదింపులు ఉండబోవని హోండురస్‌ విదేశాంగ మంత్రిత్వశాఖ ట్విటర్లో తెలిపింది. తమ సార్వభౌమత్వాన్ని, గౌరవాన్ని కాపాడుకునేందుకు హోండరస్‌తో సంబంధాలు తెంచుకుంటున్నామని తైవాన్‌ కూడా ప్రకటన వెలువరించింది. తమ దేశంతో దౌత్య బంధం కొనసాగించేందుకు హోండురస్‌ 245 కోట్ల డాలర్ల సొమ్మును డిమాండ్‌ చేసిందని తైవాన్‌ విదేశాంగమంత్రి ఆరోపించడం విశేషం.