అమెరికా బడిలో యువతి కాల్పులు.. ముగ్గురు పిల్లలు సహా ఆరుగురి మృతి

నాష్‌విల్‌ (అమెరికా): అగ్రరాజ్యంలో ఓ పాఠశాలలో సోమవారం జరిగిన కాల్పుల్లో ముగ్గురు పిల్లలు సహా ఆరుగురు ప్రాణాలు కోల్పోయారు. నాష్‌విల్‌లోని ఓ మిషినరీ పాఠశాలలో జరిగిన ఈ ఘటనలో టీనేజి నిందితురాలు కూడా ప్రాణాలు కోల్పోయింది. ఇది ఆత్మహత్యా, లేదంటే పోలీసు కాల్పులు దీనికి దారితీశాయా అనేది వెంటనే స్పష్టంకాలేదు. నిందితురాలు రెండు తుపాకీలు, ఒక పిస్తోలుతో వచ్చి పిల్లలపై కాల్పులకు దిగింది. ఈ ఘటనానంతరం ఇతర విద్యార్థుల్ని సమీపంలోని చర్చి భవనంలోకి తరలించారు. పూర్వవిద్య నుంచి ఆరో తరగతి వరకు ఉన్న ఈ పాఠశాలలో సుమారు 200 మంది విద్యార్థులు చదువుతున్నారు.