ఇదిగో ఉ.కొరియా అణుబాంబు!

ప్రదర్శించిన దేశాధ్యక్షుడు కిమ్‌

ప్యాంగాంగ్‌: ఉత్తర కొరియా వద్ద అణ్వస్త్రాలు ఉన్నాయని చెబుతుంటే వినడమే తప్ప.. ప్రపంచం చూసింది లేదు. ఇన్నాళ్లూ అణు హెచ్చరికలకే పరిమితమైన ఉ.కొరియా అధ్యక్షుడు కిమ్‌ జోంగ్‌ ఉన్‌ ఇప్పుడు స్వయంగా ఆ విధ్వంసకర అస్త్రాలను ప్రదర్శించారు. తమ దేశంలోని అణ్వాయుధ సంస్థను సందర్శించిన ఆయన.. అక్కడున్న వివిధ రకాల అణు వార్‌హెడ్లను పరిశీలించారు. ఆ ఫొటోలను ఉత్తర కొరియా అధికార మీడియా సంస్థ కేసీఎన్‌ఏ విడుదల చేసింది. అక్కడ కొత్త రకం ట్యాక్టికల్‌ వార్‌హెడ్‌లు కూడా ఉన్నాయి. స్వల్పశ్రేణి క్షిపణులు సహా అనేక అస్త్రాల్లో అమర్చేలా ఈ చిన్నపాటి బాంబులను రూపొందించినట్లు స్పష్టమవుతోంది. దక్షిణ కొరియా లక్ష్యంగా రూపొందిన వీటికి హ్వాసన్‌-31 అని పేరు పెట్టినట్లు తెలుస్తోంది. ఖండాంతర క్షిపణుల్లో అమర్చేలా వార్‌హెడ్‌ల పరిమాణాన్ని బాగా కుదించడంలో ఉత్తర కొరియా పురోగతి సాధించినట్లు ఈ చిత్రాలు సూచిస్తున్నాయి. యుద్ధనౌకలు, జలాంతర్గాములను ధ్వంసం చేసే సామర్థ్యమున్న భారీ టోర్పిడో కూడా అక్కడ కనిపించింది.