సంక్షిప్త వార్తలు(2)

గర్భిణికి కొవిడ్‌ సోకితే.. పుట్టబోయే పిల్లలకు ఊబకాయ ముప్పు

వాషింగ్టన్‌: గర్భిణులు కరోనా మహమ్మారి బారిన పడితే.. వారికి పుట్టబోయే పిల్లలకు ఊబకాయం వచ్చే ముప్పు ఎక్కువగా ఉంటుందని అమెరికా పరిశోధకులు గుర్తించారు. తాజా అధ్యయనంలో భాగంగా మొత్తం 280 మంది చిన్నారుల పరిస్థితిని నిశితంగా పరిశీలించారు. ఈ చిన్నారుల్లో 150 మంది గర్భస్థ శిశువులుగా ఉండగానే.. వారి తల్లులకు కరోనా సోకింది. మిగిలిన 130 మంది సాధారణ చిన్నారులతో పోలిస్తే వారు తక్కువ బరువుతో జన్మించారు. పుట్టాక తొలి ఏడాది కాలంలో వేగంగా బరువు పెరిగారు. ఈ మార్పుల కారణంగా వారు బాల్యంలోనే ఊబకాయం, మధుమేహం, గుండె-రక్తనాళాల సంబంధిత వ్యాధుల బారిన పడే ముప్పు అధికమైందని పరిశోధకులు తేల్చారు.

‘పాక్‌ సీజే అధికారాల కోత’ బిల్లుకు ఎగువసభ ఆమోదం

ఇస్లామాబాద్‌: సుమోటో కేసుల స్వీకరణ, ధర్మాసనాల ఏర్పాటులో పాకిస్థాన్‌ సుప్రీంకోర్టు ప్రధాన న్యాయమూర్తి(సీజే)కున్న సంపూర్ణ అధికారాలను తగ్గించేందుకు ఉద్దేశించిన బిల్లును ఆ దేశ పార్లమెంటు ఎగువ సభ(సెనెట్‌) ఆమోదించింది. ‘ది సుప్రీంకోర్టు(ప్రాక్టీస్‌ అండ్‌ ప్రొసీజర్‌)బిల్‌-2023’కు 60-19 మెజార్టీతో ఆమోదం తెలిపింది. పాక్‌ మాజీ ప్రధాని ఇమ్రాన్‌ ఖాన్‌ నేతృత్వంలోని పాకిస్థాన్‌ తెహ్రీక్‌-ఏ-ఇన్సాఫ్‌(పీటీఐ) పార్టీకి చెందిన సభ్యులు దీన్ని వ్యతిరేకించారు. బుధవారం ఈ బిల్లుకు దిగువ సభ అయిన జాతీయ అసెంబ్లీ ఆమోదం దక్కిన సంగతి తెలిసిందే. తదుపరి ఈ బిల్లును దేశాధ్యక్షుడు అరీఫ్‌ అల్వీ ఆమోదానికి పంపనున్నారు.