సంక్షిప్త వార్తలు(2)

అమెరికా జర్నలిస్టును వదిలిపెట్టండి

రష్యాకు బైడెన్‌ సూచన

వాషింగ్టన్‌: అరెస్టు చేసిన వాల్‌స్ట్రీట్‌ జర్నల్‌ జర్నలిస్టు ఇవాన్‌ గెర్ష్‌కోవిక్‌ను వెంటనే విడుదల చేయాలని రష్యాకు అమెరికా అధ్యక్షుడు జో బైడెన్‌ సూచించారు. అమెరికా పౌరుడైన గెర్ష్‌కోవిక్‌ గూఢచర్యానికి పాల్పడుతున్నారంటూ రష్యా నిఘా వర్గాలు అరెస్టు చేశాయి. ఈ నేపథ్యంలో గురువారం వైట్‌హౌస్‌లో జరిగిన విలేకరుల సమావేశంలో స్పందించాలని కోరగా.. అతడిని విడిచి పెట్టండంటూ రష్యాకు బైడెన్‌ సూచించారు. జర్నలిస్టు అరెస్టుపై అమెరికా ఉపాధ్యక్షురాలు కమలా హ్యారిస్‌ ఆందోళన వ్యక్తం చేశారు. ‘దీనిని మేం సహించబోం. తీవ్రంగా ఖండిస్తున్నాం’ అని ప్రస్తుతం ఆఫ్రికాలోని జాంబియాలో పర్యటిస్తున్న ఆమె స్పష్టం చేశారు.

బెలారస్‌లో రష్యా వ్యూహాత్మక అణ్వాయుధాలు!

టాలిన్‌: రష్యా తన వ్యూహాత్మక అణు ఆయుధాగారం యోచనలో భాగంగా తమ దేశంలోనూ అణ్వాయుధాలను మోహరించే అవకాశం ఉందని బెలారస్‌ అధ్యక్షుడు అలెగ్జాండర్‌ లుకాషెంకో శుక్రవారం ప్రకటించారు. అదే గనుక జరిగితే మరింత పెద్ద ముప్పు పొంచి ఉన్నట్లేనని అభివర్ణించారు. బెలారస్‌లో స్వల్పశ్రేణి, తక్కువస్థాయి అణ్వాయుధాలను వ్యూహాత్మకంగా మోహరిస్తామని గత వారం రష్యా అధ్యక్షుడు వ్లాదిమిర్‌ పుతిన్‌ వెల్లడించిన సంగతి గమనార్హం.