బుల్లెట్‌ ప్రూఫ్‌ హెల్మెట్‌తో కోర్టుకు ఇమ్రాన్‌

లాహోర్‌: ఉగ్రవాదం కేసులో ఆరోపణలు ఎదుర్కొంటున్న పాకిస్తాన్‌ మాజీ ప్రధాని ఇమ్రాన్‌ఖాన్‌ కోర్టుకు హాజరయ్యారు. భారీ భద్రత నడుమ ఆయన లాహోర్‌ కోర్టుకు వచ్చిన వీడియోలను పాకిస్థాన్‌ తెహ్రీక్‌- ఏ- ఇన్సాఫ్‌ పార్టీ ట్విటర్‌లో షేర్‌ చేసింది. తనను చంపేందుకు కుట్ర జరుగుతోందని.. వ్యక్తిగతంగా కోర్టుకు హాజరుకాలేనని, కేసు విచారణ ఆన్‌లైన్‌లో జరపాలని ఇమ్రాన్‌ఖాన్‌ గతంలో న్యాయమూర్తికి లేఖ రాశారు. ఈ నేపథ్యంలో ఆయనకు గట్టి భద్రత కల్పించాలని పోలీసులను న్యాయస్థానం ఆదేశించింది. దీంతో ఇమ్రాన్‌ఖాన్‌ కోర్టుకు హాజరయ్యేందుకు పోలీసులు బుల్లెట్‌ ప్రూఫ్‌ జాకెట్లను అడ్డుపెట్టి భద్రత ఏర్పాటు చేశారు. మరోవైపు, మూడు కేసుల్లో లాహోర్‌ కోర్టు ఇమ్రాన్‌ఖాన్‌కు బెయిల్‌ మంజూరు చేసింది.