US Visas: ఈ ఏడాది 10లక్షలకు పైగా అమెరికా వీసాలు

భారతీయులకు అగ్రరాజ్యం తీపికబురు

వాషింగ్టన్‌: భారతీయులకు అమెరికా శుభవార్త చెప్పింది. ఈ ఏడాది మన దేశానికి చెందినవారికి రికార్డు స్థాయిలో 10 లక్షలకుపైగా వీసాలను జారీ చేయనున్నట్లు తెలిపింది. దీంతోపాటు విద్యా సంవత్సరం ప్రారంభం నాటికే భారతీయ విద్యార్థులందరికీ స్టూడెంట్‌ వీసాల ఆమోద ప్రక్రియను పూర్తి చేస్తామంది. అమెరికాకు చదువుల కోసం వెళుతున్న విదేశీ విద్యార్థుల్లో భారతీయులు రెండోస్థానంలో ఉన్నారు. భారతీయులు అధికంగా కోరుకునే హెచ్‌-1బీ, ఎల్‌ వర్క్‌ వీసాల జారీకి ప్రాధాన్యం ఇవ్వనున్నట్లు అమెరికా వెల్లడించింది. ఈ విషయమై అమెరికా విదేశాంగ శాఖలో సహాయ కార్యదర్శి డొనాల్డ్‌లు మాట్లాడుతూ... ‘‘భారత్‌, అమెరికాల ఆర్థిక వ్యవస్థలకు కీలకమైన వర్క్‌ వీసాలకు మేం ప్రాధాన్యం ఇస్తున్నాం. వీటి జారీకి భారత్‌లోని కొన్ని కాన్సులేట్‌లలో 60 రోజుల కన్నా తక్కువ సమయమే పడుతోంది’’ అని తెలిపారు. కొన్ని నాన్‌ ఇమ్మిగ్రెంట్‌ వీసాల రెన్యువల్‌కు పిటిషన్‌దారు స్వయంగా హాజరు కావాల్సి ఉండగా, ఇలాంటి వాటిని దేశీయంగానే పునరుద్ధరించే ప్రక్రియను ఈ ఏడాది చివర్లో ప్రయోగాత్మకంగా తిరిగి అమలు చేయాలని నిర్ణయించినట్లు ఆయన వెల్లడించారు. హెచ్‌-1బీ వీసాలు ఉండీ ఉద్యోగాలు కోల్పోయిన ఐటీ నిపుణులు తమ హోదాను పునరుద్ధరించుకోవడానికి ఏమేం చేయాలో సూచిస్తూ... అమెరికన్‌ హోంల్యాండ్‌ సెక్యూరిటీ విధివిధానాలను విడుదల చేసిందని పేర్కొన్నారు. ‘‘భారత్‌-అమెరికా ద్వైపాక్షిక సంబంధాలకు అమెరికాలో గొప్ప మద్దతు ఉంది. భారతీయ అమెరికన్లు గత మూడు దశాబ్దాలుగా అమెరికాలోనే ఉంటున్నారు. ప్రతి ఏడాది 10 లక్షల మందికి పైగా ప్రజలు ఇరుదేశాల మధ్య ప్రయాణిస్తూ ఉంటారు. ప్రస్తుతం లక్ష మంది వరకు అమెరికన్లు భారత్‌లోనూ నివసిస్తున్నారు’’ అని డొనాల్డ్‌ లు వివరించారు.