రష్యాపై మరిన్ని ఆంక్షలు

ఆ దేశాన్ని ఏకాకిగా మార్చడమే లక్ష్యం
జీ-7 సదస్సులో సభ్యదేశాల తీర్మానం
హిరోషిమాకు రానున్న జెలెన్‌స్కీ

హిరోషిమా: ఉక్రెయిన్‌పై యుద్ధానికి దిగిన రష్యాను మరింతగా ఆంక్షల పిడికిలిలో బిగించాలని శక్తిమంతమైన ‘జీ-7’ దేశాలు నిర్ణయించాయి. ఇప్పటికే విధించినవాటికి అదనంగా ఆ దేశంపై మరిన్ని నిషేధాజ్ఞలు అమల్లోకి తీసుకురావాలని తీర్మానించాయి. ఉక్రెయిన్‌కు తమ సంపూర్ణ మద్దతును పునరుద్ఘాటించాయి. మరోవైపు- ఈ కూటమి సదస్సులో ఉక్రెయిన్‌ అధ్యక్షుడు వొలొదిమిర్‌ జెలెన్‌స్కీ ఆదివారం నేరుగా పాల్గొననున్నారు. జపాన్‌లోని హిరోషిమా వేదికగా శుక్రవారం జీ-7 శిఖరాగ్ర సదస్సు ప్రారంభమైంది. తొలిరోజు అంతర్గత చర్చల అనంతరం కూటమి సభ్యదేశాలు సంయుక్త ప్రకటనను విడుదల చేశాయి. ‘‘ఉక్రెయిన్‌కు మా మద్దతు ఏమాత్రం బలహీనపడదు. ఆ దేశంపై రష్యా అతిక్రమణలు, అక్రమ చర్యలను మేం ఉమ్మడిగా వ్యతిరేకిస్తున్నాం. ఈ యుద్ధాన్ని రష్యా ప్రారంభించింది. అదే దాన్ని ముగించగలదు’’ అని అందులో పేర్కొన్నాయి. రష్యాకు ఆయుధాలు, ఇతర మద్దతు ఇవ్వడం ఆపేయాలని ఇతర దేశాలను జీ-7 కోరింది. లేనిపక్షంలో తీవ్ర పరిణామాలు ఎదుర్కోవాల్సి ఉంటుందని హెచ్చరించింది. తాజా ఆంక్షల్లో భాగంగా రష్యాకు చెందిన దాదాపు 70 కంపెనీలపై అమెరికా నిషేధం విధించనున్నట్లు తెలుస్తోంది. జీ-7లోని ఇతర సభ్యదేశాలూ అదే బాటలోనే నడవనున్నట్లు అమెరికాకు చెందిన ఓ అధికారి చెప్పారు. రష్యాను మరింతగా ఏకాకిని చేయడమే తమ లక్ష్యమని పేర్కొన్నారు.

శాంతివనంలో శ్రద్ధాంజలి

హిరోషిమాలో అణుబాంబు దాడి కారణంగా మృత్యువాతపడ్డ వేలమంది జ్ఞాపకార్థం నిర్మించిన శాంతివనాన్ని జీ-7 నేతలు సదస్సు ప్రారంభానికి ముందు సందర్శించారు. అణుదాడిలో అసువులు బాసినవారికి శ్రద్ధాంజలి ఘటించారు.

మోదీతో భేటీ కానున్న జెలెన్‌స్కీ

జీ-7 సదస్సు కోసం హిరోషిమా రానున్న ఉక్రెయిన్‌ అధ్యక్షుడు జెలెన్‌స్కీ.. ప్రధాని మోదీతో అక్కడ శనివారం సాయంత్రం ద్వైపాక్షిక చర్చలు జరపనున్నట్లు సంబంధిత వర్గాలు వెల్లడించాయి. ఉక్రెయిన్‌-రష్యా యుద్ధం ప్రారంభమయ్యాక ఈ ఇరువురు నేతలు నేరుగా భేటీ అవడం ఇదే తొలిసారి కానుంది. భారత్‌ నుంచి శుక్రవారం హిరోషిమా చేరుకున్న మోదీకి అక్కడ ఘన స్వాగతం లభించింది.

సార్వభౌమత్వ పరిరక్షణకు భారత్‌ సర్వసన్నద్ధం: మోదీ

దిల్లీ: భారత్‌ తన సార్వభౌమత్వం, గౌరవాన్ని కాపాడుకునేందుకు సర్వసన్నద్ధంగా ఉందని ప్రధానమంత్రి నరేంద్ర మోదీ ఉద్ఘాటించారు. పొరుగు దేశాలతో ద్వైపాక్షిక సంబంధాలు బాగుండాలంటే సరిహద్దుల్లో శాంతియుత వాతావరణం నెలకొనడం అత్యంత కీలకమని పేర్కొన్నారు. జపాన్‌లో ఓ వార్తాసంస్థతో ముఖాముఖిలో.. చైనా, పాకిస్థాన్‌లతో సంబంధాలపై ఎదురైన ప్రశ్నలకు ఆయన శుక్రవారం ఈ మేరకు బదులిచ్చారు. తూర్పు లద్దాఖ్‌లో వాస్తవాధీన రేఖ (ఎల్‌ఏసీ) వెంబడి పలు ప్రాంతాల్లో భారత్‌-చైనా బలగాల మధ్య 2020 నుంచి ప్రతిష్టంభన కొనసాగుతున్న సంగతి తెలిసిందే. దీనిపై అడిగిన పలు ప్రశ్నలకు ముఖాముఖిలో మోదీ స్పందించారు. వివాదాలను శాంతియుతంగా పరిష్కరించుకునేందుకు భారత్‌ సిద్ధంగా ఉందన్నారు. పాకిస్థాన్‌తోనూ భారత్‌ సత్సంబంధాలనే కోరుకుంటోందని స్పష్టం చేశారు.