ఉక్రెయిన్‌కు ఎఫ్‌-16లపై ఒత్తిడి!

అత్యాధునిక ఆయుధాల సరఫరాకు అమెరికా సమ్మతి?

వాషింగ్టన్‌: రష్యాను రెచ్చగొట్టినట్లవుతుందనే కారణంపై ఇంతకాలం ఉక్రెయిన్‌కు అధునాతన ఆయుధాలను సరఫరా చేయడానికి నిరాకరిస్తూ వచ్చిన అమెరికా ఎట్టకేలకు ఐరోపా దేశాల ఒత్తిడికి అంగీకరించినట్లే కనిపిస్తోంది. ఉక్రెయిన్‌కు అత్యంత ఆధునాతన ఆయుధాల సరఫరాకు ముందుకొచ్చినట్లు తెలుస్తోంది. అయితే అవి ఎఫ్‌-16లేనని సమాచారం. జపాన్‌లోని హిరోషిమాలో జరుగుతున్న జీ-7 దేశాల సదస్సు సందర్భంగా ఆత్యాధునిక ఆయుధాల సరఫరా ఒప్పందం గురించి నేతలకు అమెరికా అధ్యక్షుడు జో బైడెన్‌ వివరించినట్లు అధికారులు తెలిపారు. ఎప్పుడు.. ఎక్కడ.. ఎవరు.. ఎన్ని ఎఫ్‌-16లను ఉక్రెయిన్‌కు అమెరికా అందించనుందనే వివరాలను వారు పేర్కొనలేదు. ప్రస్తుతం శిక్షణ కొనసాగుతోందని, ఈ ఫైటర్ల సరఫరాకు కొన్ని నెలల సమయం పట్టవచ్చని తెలుస్తోంది. ఉక్రెయిన్‌వద్ద పాత సోవియట్‌ కాలపు యుద్ధ విమానాలున్నాయి. అవి ఆధునిక రష్యన్‌ విమానాలను ఎదుర్కోలేకపోతున్నాయి. దీంతో తమకు ఎఫ్‌-16 యుద్ధ విమానాలను పంపాలని జెలెన్‌స్కీ పదేపదే కోరుతున్నారు. మార్చిలో ఇద్దరు ఉక్రెయిన్‌ పైలట్లను అమెరికాకు తీసుకొచ్చి ఎఫ్‌-16లపై శిక్షణ ఇచ్చారు. మరింతమంది పైలట్లను అమెరికాకు తెచ్చే అవకాశముంది.