బ్రేవర్‌మన్‌ స్పీడ్‌ డ్రైవింగ్‌ వ్యవహారంలో దర్యాప్తు చేపట్టబోం

బ్రిటన్‌ ప్రధాని సునాక్‌ స్పష్టీకరణ

లండన్‌: భారత సంతతికి చెందిన బ్రిటన్‌ హోంమంత్రి సువెల్లా బ్రేవర్‌మన్‌ స్పీడ్‌ డ్రైవింగ్‌ వివాదంపై ప్రధాని రిషి సునాక్‌ స్పందించారు. ఆమె మంత్రివర్గ నియమావళిని ఉల్లంఘించలేదని, ఈ విషయంలో ఎలాంటి దర్యాప్తు చేపట్టబోమని స్పష్టం చేశారు. గతేడాది స్పీడ్‌ డ్రైవింగ్‌ చేసినందుకుగానూ తనకు పడిన జరిమానాను దాచిపెట్టేందుకు సుయెల్లా ప్రయత్నించారని, ఈ వ్యవహారంలో తన పేరు బయటకు రాకుండా ఉండేందుకు.. ఆమె రాజకీయ సాయం కోరినట్లు వార్తలు వచ్చాయి. దీంతో బ్రేవర్‌మన్‌ తీరుపై మండిపడ్డ విపక్షాలు.. ఈ ఘటనపై స్వతంత్ర దర్యాప్తు జరపాలని డిమాండు చేశాయి. ఈ నేపథ్యంలోనే దీనిపై సునాక్‌ బుధవారం స్పందించారు. ‘‘ఈ వ్యవహారంలో నా స్వతంత్ర నైతిక సలహాదారు సర్‌ లారీ మాగ్నస్‌ను సంప్రదించాను. ఈ విషయంపై దర్యాప్తు అవసరం లేదని ఆయన సూచించారు. దాన్ని నేను అంగీకరించాను. మీ చర్య మంత్రివర్గ నియమావళి ఉల్లంఘనకు సమానం కాదని విశ్వసిస్తున్నాను. మీరు ఈ వ్యవహారానికి సంబంధించి కచ్చితమైన సమాచారం ఇవ్వడంతోపాటు క్షమాపణలు కూడా తెలియజేశారు’’ అని బ్రేవర్‌మన్‌కు రాసిన లేఖలో సునాక్‌ వివరించారు.