45 సంచుల్లో మానవ శరీర భాగాలు

మెక్సికోలో భయానక ఘటన

మెక్సికో సిటీ: ఉత్తర అమెరికా దేశం మెక్సికోలో ఒళ్లు గగుర్పొడిచే ఘటన వెలుగులోకి వచ్చింది. 45 సంచుల్లో మానవ శరీర భాగాలను పోలీసులు గుర్తించారు. కొద్దిరోజుల క్రితం కనిపించకుండా పోయిన యువతీయువకుల గురించి దర్యాప్తు చేస్తుండగా ఈ దారుణం వెలుగుచూసింది. స్థానిక అధికారులు వెల్లడించిన వివరాల ప్రకారం.. జాలిస్కో రాష్ట్రంలోని గాడలాజారా సమీపాన ఒక లోయలో ఈ బ్యాగులు బయటపడ్డాయి. అవి స్త్రీ, పురుషుల శరీర భాగాలని అధికారులు తెలిపారు. మే 20న దాదాపు 30 ఏళ్ల వయసున్న ఏడుగురు యువతీయువకులు కనిపించకుండా పోయారు. వారంతా ఒకే కాల్‌ సెంటర్‌లో పనిచేస్తున్నారు. ఆ కాల్‌ సెంటర్‌కు సమీపంలోనే ఈ బ్యాగులు దొరికాయని అధికారులు తెలిపారు. ప్రస్తుతం ఆ కాల్‌ సెంటర్‌పై అనేక అనుమానాలు వ్యక్తం అవుతున్నాయి. అక్కడ చట్ట విరుద్ధ కార్యకలాపాలకు పాల్పడుతున్నట్లు ఆరోపణలు ఉన్నాయి. మాదకద్రవ్యాలు, రక్తపు మరకలతో ఉన్న వస్తువులను గుర్తించినట్లు స్థానిక మీడియా తెలిపింది. ఇదిలా ఉంటే.. ఆ శరీరభాగాలు ఎవరివనే దానిపై స్పష్టత రావాల్సి ఉంది.