ఆఫీసులో రోజుకు 6 గంటలు మరుగుదొడ్డిలోనే..

ఉద్యోగం నుంచి తొలగించిన సంస్థ

బీజింగ్‌:  చైనాలో ఓ వ్యక్తి కార్యాలయంలో రోజుకు సుమారు 6 గంటలపాటు మరుగుదొడ్డిలో గడుపుతున్నాడన్న కారణంతో సంస్థ అతణ్ని ఉద్యోగం నుంచి తొలగించింది. దీన్ని అతడు కోర్టులో సవాల్‌ చేయగా, ధర్మాసనం సంస్థ చర్యను సమర్థించింది. వాంగ్‌ అనే వ్యక్తి 2015లో మలద్వార సమస్యతో బాధపడ్డాడు. దీనికి చికిత్స కూడా తీసుకున్నాడు. కానీ, సమస్య పూర్తిగా నయం కాలేదని చెబుతూ సుదీర్ఘంగా టాయిలెట్లో గడపడం మొదలుపెట్టాడు. దీంతో సంస్థ అతణ్ని అదే ఏడాది ఉద్యోగం నుంచి తొలగించింది. అతడి వ్యవహార శైలికి సంబంధించిన ఆధారాలను సంస్థ కోర్టుకు సమర్పించింది. అతణ్ని ఉద్యోగంలో కొనసాగించడం కుదరదని వివరించింది. కంపెనీ వివరణతో సంతృప్తి చెందిన కోర్టు ఉద్యోగికి వ్యతిరేకంగా తాజాగా తీర్పు వెలువరించింది.