తనను భారత్‌కు అప్పగించడంపై అమెరికా కోర్టులో రాణా పిటిషన్‌

వాషింగ్టన్‌: ముంబయి ఉగ్రదాడుల (2008) కేసులో నిందితుడిగా ఉన్న పాకిస్థాన్‌ సంతతి కెనడా జాతీయుడు తహవుర్‌ రాణా(62)ను భారత్‌కు అప్పగించేందుకు అమెరికాలోని కాలిఫోర్నియా డిస్ట్రిక్ట్‌ కోర్టు మేలో అనుమతిచ్చిన విషయం తెలిసిందే. లాస్‌ ఏంజెలెస్‌లోని మెట్రోపాలిటిన్‌ డిటెన్షన్‌ సెంటర్‌లో ఖైదీగా ఉన్న రాణా ఈ తీర్పును సవాల్‌ చేస్తూ హెబియస్‌ కార్పస్‌ పిటిషన్‌ వేశాడు. ఈ అప్పగింత అమెరికా-భారత్‌ల మధ్య ఉన్న ఒప్పందాన్ని రెండు విధాలుగా ఉల్లంఘిస్తుందని అతని తరఫు న్యాయవాది కోర్టుకు విన్నవించారు. అందులో మొదటిది... ఒప్పందంలోని 6(1) నిబంధన ప్రకారం భారత్‌ ఎలాంటి అభియోగాలపై విచారణ చేయాలని కోరుతోందో... అలాంటి వాటిపైనే ఎవరైనా వ్యక్తిని అమెరికాలోని ఏదైనా కోర్టు విచారణ చేసి, నిర్దోషిగా ప్రకటిస్తే అతణ్ని అప్పగించకూడదు. రాణాను ఇప్పటికే నార్తర్న్‌ డిస్ట్రిక్ట్‌ ఆఫ్‌ ఇల్లినాయిస్‌ కోర్టు విచారించి, నిర్దోషిగా ప్రకటించింది. రెండోది... ఒప్పందంలోని 9.3 నిబంధన ప్రకారం భారత్‌ పంపిన ఆధారాలు, సాక్ష్యాలు నిందితుడిని దోషిగా నిర్ధారించలేకపోతే అతణ్ని అప్పగించకూడదు. రాణా విషయంలో ఇప్పటికే అది జరిగింది. అందుకే అతణ్ని భారత్‌కు అప్పగించడాన్ని నిలువరించాలని న్యాయవాది కోరారు.