ఈజిప్టు సరిహద్దుల్లో ఘర్షణ

ముగ్గురు ఇజ్రాయెల్‌ సైనికుల మృతి

జెరూసలెం: ఈజిప్టు సరిహద్దుల్లో శనివారం జరిగిన రెండు ఘర్షణల్లో తమ దేశానికి చెందిన ముగ్గురు సైనికులు, ఓ ఈజిప్టు సైనికుడు ప్రాణాలు కోల్పోయారని ఇజ్రాయెల్‌ సైన్యం పేర్కొంది. ఈజిప్టు సైన్యం దుస్తుల్లో ఉన్న ఓ వ్యక్తి తమ ఇద్దరు సైనికులను కాల్చి చంపాడని తెలిపింది. మరో కాల్పుల ఘటనలో ఓ ఈజిప్టు బోర్డర్‌ సెక్యూరిటీ గార్డుతో పాటు తమ దేశసైనికుడొకరు మృతి చెందారని పేర్కొంది. ఈ విషయాన్ని ఈజిప్టు ధ్రువీకరించింది. మాదకద్రవ్యాల ముఠాను వెంటాడుతూ తమ సైనికుడు ఇజ్రాయెల్‌ సరిహద్దు దాటాడని, ఆ సందర్భంగా ఇజ్రాయెల్‌ దళాలు కాల్పులు జరిపాయని తెలిపింది. దశాబ్దానికి పైగా ప్రశాంతంగా ఉన్న ఈజిప్టు-ఇజ్రాయెల్‌ సరిహద్దుల్లో ఈ స్థాయిలో కాల్పులు జరగడం ఇదే తొలిసారి.